Fojerman: Bojeczka ô ôsiołku
2019.01.09
Bojeczka ô ôsiołku
podle A.Fredry
Dalszŏ tajla artykułu niżyj
Dostoł ôsioł żrać ôd pana
Do dwōch żłobōw: ôwsa, siana.
Łepōm krynci, nosym czuje,
To mu wōnio, to szteruje.
Tōż ôd czego teraz zacznie,
Kej mu żarci wōnio smacznie?
Ciynżko ruszyć, wybōr trudny,
Chycić siana, ôwsa szkubnyć?
Chycić ôwsa, żol je siana.
I tak depce aż do rana,
A ôd rana bez dziyń cały.
Choć maszkety mu wōniały,
Gupi ôsioł, kole żłobōw –
Zdechnōł z głodu.
Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.
