Europejski Parlamynt: Ślōnsko godka wygrowo… z polskim tumaczym

Sztyrnostego grudnia europosył Łukasz Kohut we swojim wystōmpiyniu w Europejskim Parlamyńcie na tymat ślōnskij godki padoł ô sytuacyji ślōnskij godki i ô wole ślōnskij społeczności na przileżytość inicjatywy Minority Safepack. Dowoł przi tymu znać, coby niy przepōmnieć w nij ô tych grupach i tych godkach, co skuli swojij sytuacyje niy sōm formalnie poznowane ôd unijowych państw.

Ôroz przeszoł z polskij na ślōnsko godka: “I stoja tukej, chocioż we Warszawie godajōm, że Ślōnzokōw i Ślōnzoczek niy ma, że niy ma prawa być ślōnskij godki, że niy ma ślōnskij nacyje. A to niy ma gańba być ze myńszości. To niy ma ganba godać po ślōnsku. Je prawie na ôpach” – zaczōn Europosył.

W tym mōmyńcie ôzwoł sie wiceprzewodniczōncy Parlamyntu Marcel Kolaja, co kludziōł tyn tref, i doł znać ô problymie z angelskim przekładym. Poprosiōł Kuhuta, coby jeszcze roz pedzioł ôstatnie zdania.

Gibko pokozało sie, iże to niy były problymy techniczne. Po wystōmpiyniu europosła Kohuta przewodniczōncy przidoł: “Dziynkuja i przeproszōm na techniczne felery. Chciołech wyerklerować, iże przekłod na angelski niy bōł dostympny, bo mōwca niy godoł we żodnym ôficjalnym jynzyku Europejskij Unije”.

Dalszŏ tajla artykułu niżyj

Wystōmpiynie idzie ôboczyć na tweetrze:

https://twitter.com/LukaszKohut/status/1338884713365327873

Pokozało sie zaroz moc ciepłych kōmyntorzy:

Polska: ślōnski to je dialekt polskigo.
Ślōnzok: godo po ślōnsku
Polske tumacze: gymba ôd udziwiōnego Pikachu

To je szumne! Europosył Łukasz Kochut godo po ślōnsku w Europejskim Parlamyńcie i symultaniczne tumacze blank sie tracōm 😀

Pokozały sie tyż wiyncyj ôsobiste kōmyntarze:

Cołkie zdarzynie w ucieszny spusōb pokozało sytuacyjo ślōnskij godki. Mogymy być radzi, iże – dziynki europosłowi Łukaszowi Kohutowi, a trocha tyż bez cufal – zrobiyło sie ô nij zaś trocha głośnij w Europie.