Dykcjōnorz Godki Ślōnskij

Dziwejcie sie, jak tyn czas wartko leci, człowiek sie starzeje, a Dykcjōnorz Godki Ślōnskij mo już 3 latka, tōż idzie pedzieć, co to już je taki mały bajtel. Zaczło sie we 2017 roku, jak żech zaczōn spisować te nasze ślōnski słowa, dyć było tego co roz to wiyncyj, tōż pogodoł żech ze Wojtkym Orlińskim, coby narychtować ku tymu jaki program, a puścić to sam, do interneca. I tak ôd listopada 2017 roku wpisowali my te hasła do dykcjōnorza, a gynau we niedziela 11 marca 2018 Dykcjōnorz Godki Ślōnskij pokozoł sie we internecu (www.dykcjonorz.eu).

We dykcjōnorzu treficie roztomańte ślōnski słowa (sztyjc prōbujymy coś tam wrazić nowego), a jejich tłōmaczyni po polsku, niymiecku, czesku, a angelsku. Kożde słowo mo tyż swoja ôdmiana, a pokozane je, jako te słowo idzie „wrazić”  do zdanio. Co je najwiynkszōm zaletōm dykcjōnorza? Możno to, że sie pokozoł, a je „on line”, tōż idzie w kożdej chwili dō niego wejrzeć. Czy dykcjōnorz je kōmpletny, abo taki „echtślōnski”? Niy, a można ani nigdy taki niy bydzie. Sōm sam ślōnski słowa, głōwnie spod Rybnika, tōż możno we inkszych kōnskach Ślōnska godo sie trocha inakszy. Dyć niy bydymy sie ô to wadzić. Dykcjōnorz mo być pōmocōm przi godaniu, czytaniu, abo pisaniu po ślōnsku, dyć niy ma to żodno „wyrocznia”, ani „muster”. Kej u Was sie godo trocha inakszy po ślōnsku, tōż godejcie po swojimu, yno rōbcie to dobrze, a kōnsekwyntnie.

Wierzymy, że kedyś jynzyk ślōnski bydzie mioł swoja jedna gramatyka a  pisownia, a Dykcjōnorz Godki Ślōnskij pōmoże jōm poskłodać. Tōż zaglōndejcie do dykcjōnorza, piszcie nōm, kej treficie felery, a powiydzcie tyż ô nim Waszym Kamratōm. Dykcjōnorz je dlo Wszystkich Ślōnzokōw i niy yno Ślōnzokōw, chocioż nikerzi możno godajōm, a piszōm trocha inakszy.

Dalszŏ tajla artykułu niżyj

Stasiek Neblik i Wojtek Orliński