Drugŏ edycyjŏ Festiwalu elektrONarracje ôd 6 lipnia w rujinach Tyjatru Victoria w Gliwicach
ElektrONarracje to ekstra festiwal, co po dalszy rŏz wizualnie i klangowo ôczaruje gliwiczanōw i niy ino.
We sztyry lipniowe piōntki rujiny Tyjatru Victoria bydōm połne elektrōnicznyj muzyki i niyôbyczajnych ôbrazōw. Na ôczach ôglōndŏczy ôżyjōm kōmiksowe ôzprŏwki ô Gliwicach, a klasyczne niyme filmy dostanōm niytypowe muzyczne interpretacyje.
W kożdy wieczōr ôdbydōm sie dwie projekcyje – ekstra narychtowanŏ animacyjŏ kōmiksu jak tyż pokŏz filmu niymego z muzykōm na żywo. Twōrcy wizualni wziōnli sie kōmiksy ôbrane z antologije „Niczego sobie. Komiksy o mieście Gliwice”, wydanyj ôd Muzeum w Gliwicach. Ôżywiōnym ôzprŏwkōm inspirowanym historyjōm miasta tŏwarziszyć bydōm niyme filmy z ekstra akōmpaniamyntym we formie muzyki elektrōnicznyj ôdtwŏrzanyj ôd lokalnych DJ-ōw.
Projekcyje w rujinach Tyjatru Victoria bydōm dziŏć sie we sztyry lipcowe piōntki. Kożdy festiwalowy wieczōr poczynać sie bydzie ô godzinie 20.00, a stymp na je darmowy. Inauguracyjŏ fajru już 6 lipnia, jak ôglōndŏcze ujzdrzōm animacyjõ kōmiksu „Capitol” autorstwa Marka Turka jak tyż klasyczny niymy film „Pancernik Potiomkin” w źwiynkowyj aranżacyji Zbigniewa Chojnackiego. Na dalszy piōntek – 13 lipnia zaplanowano było pokŏz animowanyj wersyje „Kōmandosōw z Berlina” autorstwa Rafała Szłapy jak tyż elektrōnicznõ improwizacyjõ Jacka Latonia aka CuefX do dalszyj niymyj produkcyje filmowyj – „Fantōmasa”. 20 lipnia na ekranie ôżyje kōmiks „Victoria”, co jego autorami sōm Tomasz Kontny i Anna Helena Szymborska. Projekcyji tŏwarziszyć bydzie pokŏz kultowego „Metropolis” Fritza Langa z muzycznōm ôprawōm Michała Wajdzika aka Rabbit ôn The Moon. Finoł festiwalu ôdbydzie sie 27 lipnia. Wtynczŏs w rujinach Tyjatru Victoria bydzie szło ujzdrzić animacyjõ kōmiksu „Marcowe ulice” autorstwa Daniela Gizickiego jak tyż Grzegorza Pawlaka. Mocny kōniec fajru zagwarantuje pokŏz absolutnego klasyka kina niymego – na ekranie ukŏże sie „Nosferatu – symfōnijŏ grozy”. Źwiynkowõ ilustracyjõ do filmu zagwarantuje Sebastian Pypłacz aka Pan Stian.
Festiwal elektrONarracje ta idyjŏ Stŏwarziszyniŏ Inicjatywa. Piyrszŏ edycyjŏ fajru ôdbyła sie w łōński rok i podbiyła serca gliwiczanōw – gŏdŏ Tomasz Szabelski, szef Inicjatywy i pōmysłodŏwca festiwalu – Wtynczŏs w czasie plenerowych projekcyji ôżywiylimy sztyry piyrsze kōmiksy z antologije „Niczego sobie. Komiksy o mieście Gliwice” („Garbus”, „Ballada o tym jak zły Mansfeld swój apetyt zaspokoił”, „Zobaczyć króla”, „Czowiek z żeliwa”).
Dalszŏ tajla artykułu niżyj
Wiyncyj informacyji idzie znojść pod adresōm: www.facebook.com/festiwalelektronarracje
Stymp na wszyjske projekcyje je darmowy.
Autorzi animacyji użyli ôbrazōw i tekstōw z antologije „Niczego sobie. Komiksy o mieście Gliwice” wydanyj w 2012 roku. Antologijõ idzie kupić na www.muzeum.gliwice.pl
Copyright © by Muzeum w Gliwicach.
Festiwal elektrONarracje dzieje sie dziynki dofinancowaniu Urzyndu Miasta Gliwice i we spōłpracy z Muzeum w Gliwicach.
