Chaja na zimowym stepie

Co sie tak richtich wydarzyło we ôstatniym tydniu we Kazachstanie.

Ze poczōntkym roku fest dźwigli cyny na gaz do autōw na tanksztelach. Skiś tego kupa ludzi bōło fest niyradych na rzōnd.

We pŏra miastach ludzie zlejźli sie protestować. Tak tyż bōło we nojwiynkszym mieście Almaty, kaj żyje 2 miliōny ludziōw. Ale skiś tego niy bōło jeszczy żŏdnej chaje, choć bōło już słychać pŏra strzalōw. To bōło we wtorek, czwortego stycznia.

Na drugi dziyń zajś sie ludzie zlejźli. Ale terŏzki bōło tam kanc prowokatorōw, co wołali by szturmować rathauz i dŏwny pałac prezydynta zarŏz ôbok. Policyje i wojŏkōw, co stŏli jeszczy dziyń niyskorzij, prawie niy bōło tam blank. Normalni dymōnstranci poszli wartko do dōm, a szturmować zaczyły chachary, kierych kupa przijechało do miasta.

Dalszŏ tajla artykułu niżyj

Wartko wlejźli do rathauzu i pałacu prezydenta i napoczli plōndrować.

Co ôstało, to podpŏlyli. Chned zleciało sie jeszczy wiyncyj chacharōw i lōmpenproletariatu. Pŏra z nich zabiyła policyjõ, a ôni sami tyż zabiyli pŏra policyjōnōw. I zaczyło sie plōndrowaniy geszeftōw we cołkim mieście.

Do flugplacu tyż sie ciepli. Po tym jak zginyło pŏrãnŏście policyjōnōw, policyjŏ niy pokozywała sie we Ałmaty sztyry dni i nocy. Bez tyn czas we mieście rzōńdziōły bandyty, chachary i zwykłe lōmpy kiere plundrowały geszefty. Nojbarzij upodobali sie elektrōnika i dizajnowe klamoty a trzewiki.

Bandyty kradły auta i to nawet na drōdze, jak kogoś ôstanowiyli. Do tego zjechały sie bandyty ze sōmsiednich regiōnōw i nawet ze Kirgistanu, co je zarŏz niydaleko.

Czamu tak wartko pokŏzoł sie chaos i anarchijŏ we mieście, co mŏ dwa miliōny perzōnōw?

Bez te pŏra dni we stolice kraju co sie piyrwej zwała Astana a terŏzki Nur-Sułtan bōł pokōj a porzōndek?

Do tego na samej szpicy polityki robiōły sie wielkie zmiany. Stary prezydynt, kiery poszoł dwa lata niyskorzij na niby rynta, mioł jeszczy pod kōntrolōm armijŏ i agyntōw. I blank wartko zabroł mu to nowy prezydynt. I wyciep pŏra jego ludzi ze amtōw.

We pŏra miastach ściepli dynkmale starego prezydynta, bo już go mieli fest za kanc.

Mōg bych jeszczy sam dugo rozprawiać, ale to wszystko zdŏwŏ mi sie być zrobiōnym po planu. Terŏzki we telewizyje prezydynt i inksi gŏdajōm ô 20 tauzynōw terrorystōw, co niby chcieli zaatakować Kazachstan, a mi to wyglōndŏ na plan kazachskich elit przi rōndzie.

Yno kierych – nowego abo starego prezydynta?

Pōki co wyglōndŏ na to że wygroł nowy i bandzie rzōńdziōł tera już sōm.

Rŏman Pawlyta – pochodzi spod Ôpolŏ. Skōńczōł geografijŏ i politologijŏ w Berlinie, robi i żyje w Kazachstanie.

Foto tytułowe: Ребров Олег, CC BY 2.0, via Wikimedia Commons