Aleksander Lubina: Adwentowe rzykanie #4
. . .
Dalszŏ tajla artykułu niżyj
za dŏwnego piyrwiyj bōło tak:
chałka moczōnŏ w mlyku gōrkim
pecynka we sznitki krojōnŏ cukrym poprōszōnŏ
puding ze jōhankami
ziarka bani
za dŏwnego piyrwiyj…
smutne panny zawiyrajōm, zawiywajōm,
wajajōm… wajajōm…
wajajōm spōmniynie
farfocle a paprochy pod chamarami furgajōm
kōniec, kōniec, szlus i tela…
aliści jako piyrwiej, jako pierwiyj
jako pierwiyj za bajtla
wōniŏ aniołami starki halanie po liczkach
chałka moczōnŏ w gōrkim mlyku
pecynka poprōszonŏ cukrym
puding ze johankami
ziŏrka bani
Ominy paradis sie tracił po leku, po cichu
kōniec, kōniec, szlus i tela…
terŏzki już ino dyszcz a ziōmb a czas
ino czas a dyszcz a ziōmb
żyżyń a głōd
Starzikōwŏ truła zgliwiōła już pŏra rokōw nazōd
kōniec, kōniec, szlus i tela…
niy ôstało wiela
farfōcle a paprōchy pod chamarami furgajōm
kōniec, kōniec, szlus i tela…
terŏzki już ino dyszcz a ziōmb a czas
inō czas a dyszcz a ziōmb
żyżyń a głōd
straciły sie drzewinka i cześnia
kapliczka z Pōnbōczkiym kole cesty je furt
Ôjczenasz,
Zdrōwaś
Aniele Boży, Strōżu mōj
to niy złoto-modre rzykanie
to takie ze starkōm po naszymu gŏdanie
bo jako piyrwiej jako pierwiyj za bajtla
źrzałymu chōpu
wōniŏ aniołami starki halanie po liczkach
smakuje źrzałymu chōpu
bez zymbōw
chałka moczōnŏ w mlyku gōrkim
pecynka we sznitki krojonŏ cukrym poprōszonŏ
puding ze jōhankami
ziŏrka bani
aliści jako piyrwiej, jako pierwiyj
jako piyrwiej za bajtla
wōniŏ aniołami, wōniŏ aniołami
wōniŏ aniōłami starki halanie po liczkach
opy ôsprawianie ô smutnych pannach
ô dandze ô chamarach
Górnoślązak/Oberschlesier, germanista, andragog, tłumacz przysięgły; edukator MEN, ekspert MEN, egzaminator MEN, doradca i konsultant oraz dyrektor w państwowych, samorządowych i prywatnych placówkach oświatowych; pracował w szkołach wyższych, średnich, w gimnazjach w szkołach podstawowych i przedszkolach, literat tworzący po polsku, po śląsku, po niemiecku, publicysta, współtwórca KTG Karasol.
Fotografie: Aleksander Lubina i Joanna Jakóbik
