Papuasy a Fojerman (3) Polok we kosmosie
Dejcie pozōr: Tekst prosty bōł pisany zarozki na laptopie, a tekst we kursywie bōł piyrwej pisany we hefcie, jak niy mioł żech przi sia laptopa, a dziepiyro potym sam wrażōny.
Polok we kosmosie
2025.05.23 godz.22:20
Tak se myśla: kedy sie to skōńczy w jedna, abo we drugo strōna? Chcioł bych już wiedzieć, czy pojada, abo niy pojada. Nō ja, dyć to jo musza zdecydować, a to niy ma tak leko. Jak żech dzisiej usłyszoł, co nad Doha wybuchajōm bōmby, abo rakety, a niebo we Katarze je zawrzyte, to żech se pōmyśloł, że terazki już je tyn kōniec, już żodyn nikaj niy poleci na razie. A wiycie, co ôni pedzieli: to było bezmała yno taki na niby, tyn atak ôd Iranu, ôni strzylali bezmała do luftu, a za wczasu im pedzieli, co bydōm strzylać. Tōż dalij sie bydōm tak bawić, choćby kot ze myszōm, a jo siedza na tych kofrach, a już mōm plynskyrze na rz…. A tak prowda pedzieć, to kofry sōm prōzne, a wszyjsko leży na kupce, te lōnty, huty, brele, mazidła na kopruchy a inksze. Niy wiym, czy to pakować, abo niy?
Dalszŏ tajla artykułu niżyj
2025.06.24 godz.8:40
Dziwny je tyn świat. Szli my spać, jak była wojna a ôbudziyli my sie, jak je pokōj. Dyć, co to je tyn „pokōj“? W kero strōna to pudzie? Dalij trza czakać a sie dziwać, co to bydzie. Jo zaś zaczynōm rozważować, coby jechać. Na razie żech niy zrezygnowoł, tōż dziwōm sie, nasłōchuja a sie nerwuja. Martynka tyż biletu na razie niy ôdmōwiła, dyć padała, co niy chce jechać, tōż niy byda jōm namowioł. Wczora skōńczyła Martynka piyrszy rok sztudyjōw, dzisiej wieza jōm ze Katowic do Nieciecze, tōż jeszcze pogodōmy, głōwnie ô mojij rajzie. A co bydzie? Tego sōm Trump niy wiy.
2025.06.25 godz 22:40
Polok polecił we kosmos. Czakoł, czakoł a sie doczkoł. My tyż czakōmy na nasz lot do Papui, a niy wiymy, czy sie doczkōmy, abo niy. Bōł żech ôstatnio u Martynki we Niecieczy, myśloł żech, że pogodōmy, a sie co wyjaśni, dyć na razie je… jak było. Martynka niy chce jechać, bo sie boji, co niy poradzi potym przijechać nazod, ale zrezygnować tyż na razie niy zrezygnowała. Ugodali my sie, co bydymy czakać do kōńca, co to bydzie. Jeszcze mōmy 5, abo 6 dni. Fliger ze Warszawy mo wylecieć bezmała 2 godziny warciyj, ô 15:40 we wtorek 1 lipca. Szymōn ôbiecoł Martynce, co zawoło jaki papuaski dziołszki, coby miała z kim pogodać (po angelsku), a niy czuła sie tako samotno miyndzy tymi wszyjskimi farorzami a starzikami. Wczora Martynka sie zaszczypiyła ôstatni roz na ścieklizna, dzisiej kupiyła ćmawe sōnynbrele, tōż tak cołkym jeszcze niy zrezygnowała. A były taki czasy, co my rozważowali, czy jechać skuli ludożercōw. Dzisiej juz żodyn ô tym niy pamiynto.
2025.06.26 godz. 14:10
Tak sie dziwōm, co we Doha we Katarze mieli dzisiej 46 stopni hycu. Terazki majōm już yno 44, a za pora dni, jak my polecymy do Doha, to mo być yno 42. Niy dziwia sie tym kamelōm, co majōm w tych puklach tela wody, bo jo bych tyż tam piōł jak kamela. Na szczynście my bydymy yno przesiodać sie we Doha w nocy, a polecymy dalij do Singapuru, tōż niy bydymy tam wylazować na dwōr, tōż możno takigo hycu niy bydzie.
2025.06.29 godz.21:10
Mōmy niedziela wieczōr, a jo mōm jechać rano do Niecieczy, coby pōmōc Martynce sie spakować, a we wtorek wczas rano mōmy jechać do Warszawy na lotnisko. Jo mōm kofer spakowany, pora majtkōw, fuzeklōw, a praje 30 kg sie uzbiyrało. Tōż, niych sie już to zacznie, dyć podwiyl niy siedna do fligra, a ôn niy zacznie furgać, to jo jeszcze do kōńca niy uwierza w ta rajza na miesiōnczek.
2025.07.01 godz. 18:45 (WAR)
Tōż było tymu tak: ô 7:00 rano wyjechali my z Martnkōm ze Nieciecze bez Busko, Kelce, Radōm na Warszawa. Pora minut po 11 byli my we klosztorze u Misjōnarzy Werbistōw we Michałowicach. Możno by my byli przed 11, dyć na kerymś zjeździe żech pomylōł a trza było pozwiydzać trocha wiyncyj tyj stolice. We klosztorze wypiyli my po kawie, zjedli my kōnsek zisty, a braciszki zawiōźli nas na dwa auta na Okyncie. Na lotnisku byli my trocha po 12, a pōmału my ôddali te kōfry a inksze rzeczy my porobiyli. Baba jakoś tam przi tymu ôkynku, kaj my kōfry ôddowali, była jakoś potracōno, że chcymy lecieć do Papui – Nowyj Gwinyje, tak choby to było co dziwnego. Chciała widzieć wizy, dziwała sie na to, choby piyrszy roz ich widziała, a wymyślała, co niy ma daty, a możno sōm niyważne, abo jeszcze coś tam. Musiała jakoś inkszo baba z drugigo ôkynka ji pōmōc. Dyć na kōniec sie udało. Kōfry nōm wziyni, na rukzaki jakiś abcybildry polepiyli, dali po trzi bilety (Warszawa – Doha, Doha – Singapur, a Singapur Port Moresby). Fliger sztartowoł dycko o 17:40, dyć skuli wojny izraelsko-irańskij musioł lotać doôbkoła bez Egipt a Saudyjsko Arabijo, a dycko bōł za niyskoro. Pora dni tymu napisali, co terazki bydzie lotoł fliger ô 15:40. Dyć wojna sie skōńczyła, tōż zaś terazki fliger przilatowoł za wartko do tyj Dohy. Dzisiej rano prziszoł mail, co wylot bydzie ô 16:20. My czakali już na lotnisku, a doczkali my sie ô 16:30. Terazki furgōmy we lufcie, kajś nad Turcjōm mie sie zdo. Zdōnżyli my już wypić po glasce Whisky, bōnkawa a zjeś na ôbiod jakoś kura ze ryżym a lody. Na razie je fajnie. Ôstało nōm jeszcze kole 3 godziny do Dohy, potym 4 godziny pauzy, 8 godzin furganio do Singapuru, 5 godzin pauzy, a 6 godzin furganio do Port Moresby. Jutro kole 21:30 czasu warszawskigo (we Port Moresby bydzie już 5:30 rano we strzoda), bydymy we tyj Papui. Tam mōmy we stolicy spać jedna noc, a potym lecymy dalij do Wewak. Tōż sōm my już hned na miejscu. Ôdezwia sie, jak bydzie co nowego. PS. Ze Warszawy do Dohy leci z nami Misjōnorz, Werbista, kery pochodzi ze Indōnezyje, a 7 lot już je we Polsce, do 2023 bōł we Rybniku u Misjōnarzy na ul. Kościuszki, a terazki je kajś farorzym pod Poznaniym.
2025.07.02 godz. 8:10 (WAR), 9:10 (DOH), 14:10 (SIN)
Byli my we Doha, tak ôd pōł jedynostyj wieczōr do pōł trzeciyj. Sztyry godziny na lotnisku. Lotniko je „trocha“ wiynksze ôd tego we Warszawie. Miyndzy roztomańtymi bramkami do wylotu rajzuje banka, bo piechty by sie szło możno do godziny z tymi koframi. Je tam fest bogato, roztomańte sklepy ze biżuteryjōm, drogi auta, meleksami wożōm bogoczy. Nōm trefiyło iś piechty. Na pojstrzodku hale siedzi srogi, 7 metrowy niydźwiydź ze brōnzu, co se go emir Kataru kupiōł za 7 mln dolarōw. Czas przelecioł wartko, tela co my sie tōm bankōm przejechali tego niedźwiedzia ôbejzdrzeć, a trocha podziwać sie na te cuda inksze. Nojwiyncyj czasu zeszło nōm na szukaniu kokotka ze wodōm, co by sie trocha napić. Dyć to je chyba prowda, co tam je ropa łacniejszo ôd wody. Znodli my woda we kokotku za darmo, ale fest my sie musieli naszukać, niy było to tak łaps. Jōzef mo dzisiej urodziny, tōż my mu powinszowali, a ruszyli my dalij. Terazki lecymy do Singapuru. Ze Dohy sie leci 8 godzin, ale ku tymu ô 5 godzin sie czas cofie, tōż bydymy do przodku ô 13 godzin. Wylecieli my ze Dohy ô 2:30, a we Singapurze bydymy kole 15:30. We Doha bydzie wtedy 10:30 a we Polsce i na Ślōnsku 9:30. Praje pokazuje, co jeszcze nōm ôstało 1 godzina a 9 minut do Singapuru. We Singapurze bydymy yno kole 5 godzin na lotnisku a lecymy dalij do Port Moresby – 6:15 godziny. Tam już bezmała bydzie keryś na nas czakoł. Bydymy we Port Moresby kole pōł szōstyj rano 3 lipca. We Warszawie bydzie 21:30, jeszcze 2 lipca. We Port Moresby ôstanymy jedyn dziyń, ale już niy na lotniku, yno we jakijś chałupie (klosztōr? hotel?), a 4 lipca polecymy jeszcze do Wewak. Tam sie trefiymy ze Szymōnym, chocioż tak rychtyk, to Szymōn je z nami cołki czas, bo nas wachuje bez Whatsappa.
c.d.n.
