10 lŏt za bōmbōny
Kryminalni z chorzowskij kōmyndy znŏdli i chyciyli trzech miyszkańcōw Chorzowa, kerzi porwali w jednym ze sklepōw kōnfekty i sprali pracownika ôchrōny. Chopy usłyszeli już ôbskarżynia, terŏz ô jejich losie uzdŏ gyricht. Grozi im 10 lŏt heresztu.
W ôstatniõ sobotã do jednego z dyskōntōw przi ulicy Piotra weszło trzech modych chopōw, jedyn z nich chyciōł kartōn z bōmbōnami i wszyjscy wziōnli wychodzić ze sklepu, z pōminiyńciym kasy. Raub dozdrzoł pracownik ôchrōny. Jak doł im pozōr, bandyci sztuchli go i uciykli. Sprawōm zajōnli sie kryminalni z chorzowskij kōmyndy, kerzi przi analizowaniu sebranyj materyje dowodowyj wartko ôbsztalowali sprŏwcōw, i wartko ich chyciyli. Wczorej wszyjscy trzech trefiyli do policyjnego heresztu. Sprŏwcami pokŏzali sie miyszkańcy Chorzowa, co im je ôd 18 do 22 lŏt. Chopy usłyszeli już ôbskarżynia, terŏz ô jejich losie uzdŏ gyricht. Za popełnione przestympstwo grozi im kŏra nawet 10 lŏt heresztu.
Foto na wiyrchu: KMP Chorzōw