Złōmbol 2018, abo moplikym do Grecje
A Wy słyszeliście już ô Złōmbolu? Niy, to posłōchejcie. Jo tyż nigdy na Złōmbolu niy bōł, a znōm go yno z filmikōw a ôpowiadań. Pora lot tymu zebrało sie bezmała pora młodziokōw ze Katowic, a pojechało dwōma Polōnezami do Norwegie. Zbiyrali piniōndze po roztomańtych spōnsorach, a dali te piniōndze dzieckōm z dōmu dziecka. Ôd tego czasu kożdy rok na poczōntku września ruszo tyn Złōmbol spod Spodka we Katowicach. Byli już we Hiszpanii, Włochach, za kołym podbiegunowym. Latoś jadōm już dwanosty roz. Trasa mo dycko kole 2000-3000 km, a latoś wiōdła do Grecje, na Pōłwysek Chalcydycki.We Złōmbolu może pojechać kożdy, kery mo chynci, czas, jaki stare auto, autobus, motorcykel z czasōw kōmunistycznych, a nazbiyro ôd spōnsorōw 1500 zł na te dzieci. Warōnek je jedyn, że niy wolno brać piniyndzy ôd spōnsorōw do sia, wszystko trza dać na te dzieci, a jechać trza za swoji piniōndze. Ôrganizatory tyż robiōm wszystko za darmo. A co robiōm te ôrganizatory? Podowajōm miejsce, kaj trza zajechać latoś z tym Złōmbolym, a zbiyrajōm piniōndze na dōmy dziecka z woj. ślōnskigo a ôpolskigo. Ôrganizatory niy interesujōm sie tym, czy kerymu sie auto po drōdze popsuje, abo co inkszego sie stanie. Kożdy jedzie na swoji ryzyko, a podle swojigo pomyślōnku. Trza liczyć na sia, a na inkszych złōmbolowcōw. Latoś do tej Grecje pojchało bezmała ponad 800 autōw, ale tyż autobusy, ciynżarōwki, motorcykle, mopliki a co tam yno. Nazbiyrali już bzmala 1 660 000 zł,a cały czas zbiyrajōm, bo dziepiyro dzisiej majōm dojechać do tej Grecje. Tōż teraz już wiycie, co to je tyn Złōmbol. A wiyncyj możecie se poczytać a poôglōndać we interncie. Możno za rok kery z Was wybire sie tyż w tako rajza dlo ôdważnych, abo chocioż dociepnie trocha grosza ślōnskim dzieciōm. Pamiyntejcie, uczestnicy niy bierōm żodnych piniyndzy dlo sia, wszystko spōnsory dowajōm na kōnto, a za to te auta ôbstrojōne sōm roztomańtymi abcybildrami ôd tych gyszefciorzy, spōnsorōw. Ślōnzoki tyż poradzōm pōmogać inkszym.
Dalszŏ tajla artykułu niżyj
Latoś jednym ze „złōmbolowcōw” bōł tyż Rafał. Dlo Rafała niy bōł to piyrszy roz, bo bōł już na Złōmbolu i Skodōm i Polōnezym, ale tym razym wybroł sie na mopliku – Simsōnym Schwalbe. Sam możecie podziwać sie, a poczytać ô tym, jako Rafał spōmino Złōmbol.
www.zlombol.pl
Fojerman
PS. Fotki ze strōny Rafała, skopiowane były za zgodōm autora.
