Zielōny sztrōm w Rybniku
Na rybnickim wysypisku kōmunalnym powstała instalacyjŏ, co produkuje sztrōm dziynki wyużyciu metanu, co sie tworzi w czasie rozkładu ściepek.
Tm. gaz składowiskowy to miszōng gazōw gynerowanych w czasie rozkładu ściepek ôrganicznych we składowisku, co zawiyrajōm z wiynksza metan i dwutlynek wōnglŏ. Do tyj pory tyn gaz ulŏtnioł sie do atmosfery za postrzednictwym studni ôdgazowujōncych abo (jak w przipadku dwōch zawrzōnych zrekultywowanych już kwatyr) spŏlany bōł w pochodni.
By wyeliminować ymisyjõ szkłōdliwego metanu do luftu jak tyż bezproduktywne spŏlanie biogazu w pochodni, na terynie miastowego wysypiska, firowanego ód rybnickij spōłki „Hossa”, powstała hala do produkcyje ynergije z agregatami zasiylanymi biogazym składowiskowym. Inwestycyjŏ zakłŏdŏ pozyskiwanie biogazu z III kwatyry bez zabudowanie kanałōw gazowych jak tyż podepniyńcie i ynergetyczne wyużycie gazu z pochodnie.
– Rocznŏ produkcyjŏ ynergije elektrycznyj z gazu składowiskowego wyniesie kol. 4 tys. megawatogodzin i je to werta, co przizwoli zaôpatrzić we sztrōm kole 2 tys. pōmiyszkań rocznie, to znaczy kole 7 tys. miyszkańcōw – rachuje Leszek Kulawik, inwestōr. – W tyj chwili w Polsce ino 6 procynt gazōw składowiskowych je spotrzebowowane do produkcyje ynergije elektrycznyj, chociŏż tak unijnŏ dyrektywa ,jak i polske prawo przikazujōm to robić – przidŏwŏ.
Dalszŏ tajla artykułu niżyj
Ôdbiyrŏczym produkowanyj na rybnickim składowisku ynergije elektrycznyj bydzie spōłka Tauron. Co ciekawe, ynergijŏ cieplnŏ, co powstŏwŏ na wysypisku (na kere trefiŏ 30 tys. tōn ściepek rocznie) bydzie sużyć m.in. do ôgrzywaniŏ zabudowań sōmsiadujōncyj ze składowiskym sortownie ściepek Sego (ôgrzywanyj dotynczŏs za pōmocōm kotłownie wōnglowyj) jak tyż budōnkōw socjalnych samego wysypiska.
Inwestycyjŏ kosztowała bez milijōn złotych, a mŏ sie zwrōcić w czasie piyńciu nojbliższych lŏt.
Zdrzōdło: materyje presowe, foto W. Troszka