Wystawa ô ślōnskim historyku ks. dr. Johannesie Chrząszczu
We Willi Caro w Gliwicach ôd 20 kwietnia idzie ôglōndać wystawã czasowõ ô gōrnoślōnskim historyku i pyskowskim farŏrzu ks. dr. Johannesie Chrząszczu.
Ks. Chrząszcz to była jedna z ôsōb, co na kōńcu XIX i na poczōntku XX stoleciŏ przisużyły sie do budowaniŏ kultury Ślōnska. Perfekt łōnczōł ôbowiōnzki kapelōńske ze robotōm naukowōm nad przeszłościōm regiōnu. Jego duge badania naukowe prziniosły wydanie mocy publikacyji historycznych ô lokalnych społecznościach i spōlnotach. Jego dzieła sōm ekstra wert, bo zdrzōdła, co ich używoł ks. Chrząszcz, były z wiynksza zniszczōne w czasie ôstatnij wojny.
Na wystawie bydzie szło ôbejzdrzeć rynczne zŏpisy ôd kapelōna, publikacyje durkowane, ksiōnżeczki po polsku i niymiecku, jak tyż niypublikowane nikaj fotografije jego ôsoby.
Narodziōł sie we Miōnowie kole Gogōwka 27 kwietnia 1857. Bildowoł sie nojprzōd we szkole elymyntarnyj we Wierzchu, we gimnazyjach we Głubczycach, Wrocławiu i Ôpolu. Za ksiyndza bōł wyświyncōny we Pradze, robiōł za kapelōna nojprzōd we Dōmbrowie kole Ôpolŏ, potym w Rudzie. We 1888 bōł prōmowany na dŏchtora teologije na Uniwersytecie Wrocławskim. We 1890 przejōn parafijõ we Pyskowicach i tam żōł do kōńca żywobyciŏ 26 lutego 1928 roku.
Dalszŏ tajla artykułu niżyj
W 1904 ôrganizowoł Gōrnoślōnske Tŏwarzistwo Historyczne (Oberschlesischer Geschichtsverein) we Ôpolu. Pisoł do jego cajtōnga Oberschlesische Heimat, kaj nojprzōd bōł za zastympcy redachtora naczelnego, a ôd 1913 za redachtowa naczelanego.
Chrząszcz to bōł tyż jedyn z założycielōw Muzeum Gōrnoślōnskigo w Gliwicach (Oberschlesische Museum in Gleiwitz), co dzisiej nosi miano Muzeum w Gliwicach. Przigotowanŏ we Willi Caro wystawa Ks. dr Johannes Chrząszcz – górnośląski kapłan i historyk mŏ przibliżyć i upamiyntnić ôsobã tego ważnego dlŏ Gliwic, Pyskowic i cołkigo Gōrnego Ślōnska kapelōna.
Ślōnskŏ Bibliŏtyka Cyfrowŏ mŏ zbiōr tekstōw, co je ôpublikowoł Johannes Chrząszcz. Idzie tam znojś tak teksty religijne, jak tyż historyczne. Pisoł po niymiecku i po polsku.
Wystawa potrwŏ do 26 sierpnia 2018 roku.