Utrŏpy Micyny: Grajfka do szporowaniŏ
Niy kŏżdymu sie podobŏ, że piyrszŏ dama bydzie sie hned radować geltakiym we wysokości kole trzinŏstu tysiyncy złotych brutto. Ale za to kupã ludzi trzimie krzciuki za rechtorōw abo za retownikōw TOPR, kerzi swōj geltak dostŏwajōm kŏżdego miesiōnca, a jeszcze by chcieli podwyżek. A niby skōnd tyn biydny regyrōnek mŏ brać na to wszyjsko pijōndze. Dyć niy idzie dać wszyjskim, kajś trza uszporować. Kŏżdy z retownikōw chcioł tysiōnc złotych wiyncyj, a przeca już zarŏbiali strzednio aże 3300 zł. Tych gizdōw na etacie je trzidziestu ôźmiu, tōż leko idzie porachować, że ze skarbu państwa straciylibymy na nich trzidziści ôziym tauzynōw miesiyncznie. Beztōż regyrōnek doł im po sztyrysta złotych na gowã co cuzamyn do kupy dŏwŏ piytnŏście tysiyncy dwiesta. Dziynki tymu idzie dać tyj biydnyj kobiycie te trzinŏście tysiyncy a i tak mōmy uszporowane bezma dziesiyńć tauzynōw. Tōż niy bydźcie take niyôdwdziynczne i ustōńcie wajać na tyn regyrōnek, kery, jak żech wōm tukej wykŏzała, je richtig fest szporobliwy. I niych wōm niy bydzie żŏl retownikōw, bo kŏżdy wiy, jake to sōm miglance. Cołkimi dniami łażōm sie po gōrach i podziwiajōm widoki. I yno rŏz za kedy muszōm śniyś ze sztreki jakigoś borŏka, kery sie prawie zrobiōł krziwdã. A jak sie leserōm niy chce iś piechty to lecōm po niygo helikopterym. Majōm z tyj roboty tyż inksze ekstra prefity. Jak niy wierzycie, to już wōm dŏwōm przikłŏd. I to dyrekt z jejich krōniki, kaj idzie znojś bezma wszyjske detajle. Bezma, bo niykere rzeczy to już idzie doczytać yno miyndzy wierszami.
Dwudziestego grudnia o 16.35 TOPRowcy ôdebrali telefōn ôd właściciela pōmocy drogowyj z informacyjōm, iże przed chwilōm zazwōniyli do niego dwa turysty i pedzieli, że straciyli sztrekã kajś miyndzy Kasprowym Wierchym a Kopōm Kōndrackōm. Czymu woleli szkyrtnōńć do pōmocy drogowyj zamiast do TOPRu? Możno miarkowali, że pryndzyj przijedzie po nich lastautym jaki mechanik aniżeli te zgniyłe retowniki? Fto to wiy? Zōuwizōu, mechanik doł TOPRowcōm nōmer ôd turystōw, bo chyba prawie niy mioł wolnego auta. Retowniki zazwōniyli do tych borŏkōw, i ze pōmocōm jejich namiarōw GPS poradziyli ôbsztalować, że chopy sjechali na rziciach 130 metrōw z grani Suchego Kondrackigo. Z cyntrale ku Hali Kōndratowyj a potyn na wiyrch w strōnã turystōw ruszyła grupa szejściu retownikōw. Bez tyn czŏs borŏki mieli prōbować po włosnych śladach zōnś nazŏd na grań. Po prŏwdzie żŏdyn ś nich niy bōł ranny, nale niy mieli ze sobōm taszynlampy, tōż na zicher niy bōło to leke zadanie. Przi nastympnyj gŏdce bez mobilniŏk turysty pedzieli, iże jedyn ś nich straciōł w śniegu szczewika (zorty adidas) i niy poradzi go znojś. O 18.56 TOPRowcy znŏdli turysty w dwiōch szczewikach na grani. Karlusa w jednym adidasie trefiyli pŏrã minut niyskorzij kōncek pod graniōm. Ôbōch ôgrzali, zabezpieczyli stopã ôd pōłbosego i napoczli ich skludzać ku dołowi. Wtynczŏs już nastympnŏ trziôsobowŏ grupa retownikōw szła ku nim z ibrycznym szczewikiym. O 20.43 całŏ czelŏdka doszła do schrōniska na Kōndratowyj, skōnd TOPRowcy autym wziynli turystōw do lazarytu.
Niby wszyjsko fajnie, pra? Nale mie sie to wszyjsko zdŏwało fest podyjzdrzane i musiałach zadać pŏrã ekstra pytań. Na co aże dziewiyńciu retownikōw cisło po dwiōch chopōw co sie straciyli w gōrach? Byli tam aby wszyjscy przidajni? A możno szli tam yno skuli tego coby narobić auflaufu? Tak tych borokōw zbamōńcić, coby sie bez cufal niy kapli ô co sie tam richtig rozchodzi? Jŏ żŏdnego ô nic niy ôbskarżōm, ale możno ftoś musi ludziōm yntlich ôdewrzić ślypia. Niych niy przijmujōm wszyjskigo bezkrytycznie, niych zadŏwajōm ciynżke pytania, niych ôdkrywajōm ta istnõ prŏwdã skrytõ miyndzy wierszami. Yno wtynczŏs naszym ślypiōm ukŏże sie połny ôbrŏz tego, co sie richtig przitrefiyło.
Dalszŏ tajla artykułu niżyj
Ô autōrce: Miyszkōm na Fytlu, a z tyj perspektywy świat zdŏ sie być trochã inkszy aniżeli Wy go pewnikiym widzicie. Jak chcecie sie ździybko wejrzeć bez moje brele, zaprŏszōm na blog.
Fotografijŏ: Ania Katroshi