Ślōnsko Godka niy zaginie
21 lutego ôbchodzymy Międzynarodowy Dzień Języka Ojczystego a u nas je to Dziyń Ślōnski Godki. Międzynarodowy Dzień Języka Ojczystego jak wszyjscy wiymy ôstał ustanowiōny przez UNESCO 17 listopada 1999 r.
Jako, że wiynkszość mieszkańcōw Slōnska godo tym jynzykiem kieryn nōm przekozali nasi starziki toż trza pamiyntać ô tym żeby mustrym naszych przodkōw przekazywać jōm młodszymu pokolyniu. Inacy nasze wnuki niy bydōm wiedzieć co to gruba, familoki czy ancug. Tōż nasi miyszkańcy we wiela miastach i Gminach mieli w zocy tyn dziyń. Były rozmańte fajery, czytania po naszymu i wiela inszych tymu padanych trefōw. Jednōm s takich Gmin kaj taki fajer boł kieryńś już roz s rzyndu sōm Świyrklany. To tukiej we sali bankietowej Gminnego Ośrodka Kultury i Rekreacje Przedszkolacy, Szkolorze, Koła Gospodyń Wiejskich i Klubu Młodego Seniora pokozali jak przajōm naszej godce i w jaki zocy majōm downe zwyczaje i tradycje. Było tela norodu, że nawet ôrganizator kierym boł wyży wymiyniōny GOK i R był zaskoczōny tym, że tak wiela miyszkańcōw tych starych i tych najmyńszych prziszło na tyn tref. Widać, że w tej Gminie ludzie przajōm naszej ślōnski godce. Tref wsparty bez Włodarzy Gminy udała sie na medal. Brali w ni udział Koła Gospodyń Wiejskich ze Świerklan i Jankowic, bajtle s Przedszkolo i Szkoły ze Świerklan Górnych i Dolnych, Klub Młodego Syniora ôroz pojedynczy miyszkańcy, a całoś uświetniły Zespoły Karolinki s Jankowic i Paulinki ze Świerklan. Boło wiela uciechy, śpiywkōw, bojek, beranio, i tańcōw bo przeca kożdy chcioł sie pokozać s jak nojlepszej strōny .Ô podniebiynia zadbały człōnkinie KGW przygotowujōnc przepyszne kerple i ciasta.
Tu trza jeszcze pedzieć ,że nojbardzi zasłożyni we kultywowaniu ślōnskich zwyczajōw, tradycji i godki dostali ôdznaki i dyplōmy Pszociela Slōnski Godki . Ôdznaki te ôstały ustanowiōne bez Halymbskie Koło Związku Górnośląskiego a pōmysłodawcōm i inicjatorym plebiscytu na takigo Pszociela Slōnski Godki boł Rudzianin Bronisław Wątroba .Raduje nas fest to ,że chocioż pandymjo przerwała na pora lot taki trefy to jednako dziynki mieszkańcōm kierzy przajōm godce i miejscu kaj miyszkajōm i kaj sie urodzili przi sparciu Włodarzi, Ośrodkow Kultury i wiela inszym wrocili my do tego co je nōm we najwiynkszej zocy do Dziedzictwa naszych Starzikōw. Możymy być pewni, że to dziynki nim nasza ślōnsko godka niy zaginie.
Dalszŏ tajla artykułu niżyj
Regina Sobik