Ślōnske derby w rugby już w sobota
Już w nojbliższo sobota, 23 paździyrnika br. na Burloch Arynie we Rudzie Ślōnskij Ôrzegowie ôdbydzie sie richtig ciekawy derbowy szpil we II lidze rugby pōmiyndzy K. S. RUGBY Ruda Ślōnskŏ a Hegemonym Mysłowice.
W ôstatnij rōndzie podzimnyj II ligi zmierzōm sie wicelider (gospodorz trefu) i lider ligowyj tabule. Hegemony z Mysłowic sōm do terozki rewelacyjōm III poziōmu ligowego w Polsce. Mannszaft, kery powstoł ganc niydowno, bo w 2019 r. i swojo przigoda z ligowym rugby 15-ôsobowym napoczōn dopiyro ôd tego sezōnu, to znaczy je prawym beniaminkiem, jak do teroz wygroł wszyjske swoje szpile. W pokōnanym pōlu ôstawiōł drugigo bieniaminka ligi Res Energy Rugby Team Olsztyn, Miedziowych z Lubina a nawet tych, co slecieli z I ligi – Wataha RC Zielōnŏ Gōra i z kōmpletym pōnktōw je na wiyrchu ligowyj tabuli. Gryfy ze Rudy Ślōnskij zaczli zaś od falstartu we piyrwszym auswartszpilu we Ôlsztynie, atoli niyskorzij było już ino lepij (zwyciynstwa nad Lubinem i Zielōnōm Gōrōm). Rudziany to utytułowany ślōnski mannszaft, weterany ligowych szpilplacōw – we II i I lidze ze zmiynnym szczyńściym grajōm już ôd 2013 r.
Bydōm to piyrsze ślōnske derby w rugby ôd 32 lot, kedy to ôstatni roz grały ze sobōm w ligowych szpilach dwa mannszafty z Gōrnego Ślōnska: 23.09.1989 – ôstatnie derby Gōrnego Ślōnska: Czorni Bytōm – Ślōnsk Ruda Ślōnskŏ, szpil I ligi, rozegrany we Bytōmiu, zakōńczōny wynikym 6:0. Piyrsze, historyczne derby u nos bōły 31.03.1957. kedy to Gōrnik Katowice zmierzōł sie we piyrszyj lidze z Gōrnikiym Kochlowice (terozki dzielnica Rudy Ślōnskij) i przegrōł 9:12 we Murckach.
Dalszŏ tajla artykułu niżyj
Trza przidać, iże rugby mo na Gōrnym Ślōnsku piykno historyjo. Grubiorze z Rudy Ślōnskij Kochlowic ôstali zaproszyni do rozegranio w dniu 15 września 1956 r. we Warszawie piyrszego ôficjalnego szpilu rugby po II wojnie światowyj w Polsce. Rywōlym był manszaft AZS AWF Warszawa, kery zwyciynżył po wyrōwnanym i zaciyntym szpilu ino 3:0. Historyjo pisano była tyż medalami: w 1957 – ww. Gōrnik Kochlowice zdobōł brōnzowy medal Mistrzostw Polski, w 1959 r. Majstrym Polski ôstali Czŏrni Bytōm, a w 1989 r. tytułym wicemistrzowskiym zaś radowali sie rugbisty z Rudy Ślōnskij.
Fest smaczkiym sobotnigo szpilu bydzie ekstra nadgroda dlo zwyciynskigo mannszaftu – przechodnie trofeum „Rugbowy Kilof Hajerski”. Po kożdym szpilu pōmiyndzy gōrnoślōnskimi mannszaftami wandrować ôn bydzie do wygranych. Posiodanie trofeum wzbogaci szportowo rywalizacyjo i potwierdzi fakt bycia „nojlepszym” na górnoślōnskim szportplacu. Do nastympnego wspōlnego szpilu.
W sobota 23 paździyrnika br. bydymy na zicher ôbserwować niyôbyczajne ymocyje. Gōra weźnie doświadczynie rudzkich Gryfōw eli euforia niesiōnych na seryji zwyciynstw Hegemonów? Przekōnej sie na swoje włosne ôczy.
SZPIL II LIGI RUGBY
K. S. RUGBY RUDA ŚLŌNSKO – HEGEMON MYSŁOWICE
23 PAŹDZIERNIKA 2021 R., (SOBOTA), GODZ. 17:00
BURLOCH ARYNA, ul. BYTOMSKA 13-15, RUDA ŚLŌNSKO ÔRZEGŌW
Wojciech Kołodziej, K.S. Rugby Ruda Ślōnsko