Rybnik: We tōnelu widać światło
Tōnel pod beszōngym na Paruszowcu, co mo „skuplować” ze sobōm dwie rybnicki dzielnice – Paruszowic-Pioski a Rybnik Pōłnoc, je już do pōł wykopany. Już bezmała na wiosna pudzie tam przelyź piechty, abo przejechać na kole miyndzy ul. Mikołowskōm a Żużlowōm.
Ekstra siyłowniki wciskajōm do beszōnga graniato betōngowo „ruła”, a z pojstrzodka wybiyrano je ziymia. Jedna tako „graniato ruła” już je wcisnyto do beszōnga, a trza jeszcze wciś drugo. Trza to tak robić, bo na wiyrchu po beszōngu sztyjc jeżdżōm cugi na sztrece Rybnik-Katowice. Bez tyn tōnel bydōm mōgli jeździć ludzie na kołach, ale pudzie tyż chodzić piechty, a niy trza bydzie sie spinać po beszōngu, a przelazować bez glajzy, kaj jeżdżōm cugi.
Sōm tōnel, to niy ma wszystko, bo bydzie tyż tam plac do przesiodanio sie z koła, abo ze auta do cuga, kery bydzie sie mianowoł cyntrum do przesiodanio sie „Paruszowiec”.
Dalszŏ tajla artykułu niżyj
Kożdy, gdo bydzie chcioł jechać cugym do roboty, abo do szkoły, bydzie mōg se tam ôstawić pod dachym swoji koło. Bydōm tyż place, kaj bydzie szło stanyć na chwila autym, jak kery prziwiezie drugigo na cug (Park&Ride) – pado prezidynt Rybnika Piotr Kuczera. – Na placu bydzie światło a kamery. Bydōm tam tyż trowniki a ławki do siednycio.
Tōnel kopiōm fyrmy ze Byndzina, co wygrały przetarg, a kosztować to bydzie wszystko wiyncyj, jak 5,8 mln zł. Trza pedzieć, że praje 2,5 mln na ta robota dała Unijo Europejsko ze swojigo Planu Zrōwnoważōnej Mobilności.
Fotografije: W. Troszka
Materiały UM Rybnik, po ślōnsku napisoł Stanisław Neblik.
