Rybnik postawiōł dynkmal braciōm Szafrankōm
We Rybniku kole banhowa postawiyli ôtok dynkmal braciōm Karolowi a Antōniymu Szafrankōm. Bracio Szafranki, to były fest zocne muzykanty, ôtworzili we Rybniku Szkoła Muzyczno w 1933 roku, kero terazki mo jejich miano. Miano ôd braci Szafrankōw mo tyż Rybnicko Filharmōnijo. Dzisiej Szkoła Muzyczno je przi ul. Powstańców Śląskich, kaj downij bōł lazaret, a urodziōł sie tam niyjedyn mały rybniczanin. We szkole tej, jeszcze na starym placu, przi dzisiejszej ul. J. Piłsudskiego, kaj terazki stoji sōnd, tyż „rodziyli sie” – muzycznie, znani rybniczanie – Lidia Grychtołówna, Piotr Paleczny, Adam Makowicz, Henryk Mikołaj Górecki.
Starszy z braci Szafrankōw – Karol, urodziōł sie w 1904, a umrzōł w 1997 roku. Groł na klawiyrze, a do roku 1970 bōł tyż dyrektorym „swojij” szkoły.
Młodszy Antōni groł na krzipkach a potym ôstoł dyrygyntym we Rybnickij Filharmōniji. Antōni Szafranek umrzōł w 1979 roku.
Bracio pochodziyli z gōrniczej familije, kero w 1895 roku wyjechała do Westfalije, a w 1920 roku przikludziyła sie nazod na Ślōnsk, do Rybnika.
Dalszŏ tajla artykułu niżyj
Tōż, jak przijedziecie kedy cugum do Rybnika, a wyleziecie z banhowa i zejrzicie jakiś dynkmal, co na nim jedyn chłop gro na krzipkach, a drugi kole niego siedzi a gro na klawiyrze, to już bydziecie wiedzieć, co to bracio Szafranki witajōm Wos we Rybniku.
Fot. W. Troszka /L. Tyl (UM Rybnik)
