Rafał Szyma: Wiyszać ta fana abo niy?
Na jedno – 2 mŏja to je polski dziyń polskij fany. Dziyń ekstra na to, coby Polŏki pokŏzali sie ze swojimi farbami. Badnijcie pōłne miano: “Dziyń Fany ôd Polskij Republiki”, a niy kożdyj jednyj. Robić naschwŏl i wystawiać żōłto-modro na plac bioło-czerwōnyj? Trocha to wōniŏ na sorōństwo, pra?
Na drugie – no przeca ô to sie rozchodzi, coby sie pokŏzać, zadymōnstrować, fto jŏ je. Coby niy dać blank zdōminować publicznygo przestrzyństwa, symbolicznie pokŏzać, co sam je Ślōnsk i krōm Polŏkōw żyjōm sam tyż autochtōny. Zachachmyńcić kōmu świynto tak, coby robiyło za swoje włŏsne – to je przeca stary knif ôd Kościoła na kulturowe zwyciyństwa. Tak za starego piyrwyj ôbsztalowoł czas Godōw, tak sie we XX wiyku pokŏzało, co 1 mŏja to je tak po prŏwdzie spōmniynie świyntego Jōzefa Rzymieślnika, tak terŏzki dziecka majōm ôrŏz maskynbale wszyskich świyntych bez czas Halloween.
I na trzecie – niy ma to aby bŏznowanie z tymi fanami? Te cołkie pokazowanie cudzym ludziōm tego, żech je Ślōnzŏkiym? Niy rozchodzi sie sam ô to, co by mie było gańba przed Polŏkami, ino ô to, co je, a czego niy ma we ślōnskij wrażliwości. Zawdy zdŏwało mi sie, co to je wiyncyj ślōnskie: niy pokazować, niy dymōnstrować, ôstawić sie swoja tōżsamość ino do sia. Iś kajś z fanōm – to niy ma “gemütlich”.
Abo tak miarkuja, bo żech erbnōł tyn ślōnski strach? Gynau tyn, co go moderne Ślōnzŏki majōm ôdciepać, jak sie niy chcōm stracić miyndzy Polŏkami?
Dalszŏ tajla artykułu niżyj
Tōż niy wia: wiyszać, abo niy.
