Praczka pseudokibicōw w Tychach
Do batalije kole 300 kibicōw miało dojść wczorej w parku miyjskim przi ul. Edukacyje w Tychach. Na placu zarŏz ukŏzali sie tyscy policyjōny jak tyż mōndurowi z jednotek ôściynnych. Skuli zdarzyniŏ zastawiōno było 6 pseudokibicōw. Szandarzi uzdŏwajōm, co sie trefiyło, jak tyż uczestnikōw. Zastawiyni stanōm przed prokuratorym, co uzdŏ ô jejich dalszym losie. Dziynki gibkij akcyji policyjōnōw grupa sie rozproszyła i niy doszło do eskalacyje kōnfliktu, a możno nawet tragedyje.
Wczorej po godzinie 20.00 policyjōny z Tychōw dozdrzeli w rejōnie parku miyjskigo przi ul. Edukacyje chuliganōw ôblyczōnych w dresy, kominiarki, rynkawice do sztuk walki jak tyż ôwijki bokserske. Grupa kole 150 ôsob wleciała do parku, i wziōnła lecieć w strōnã drugij grupy pseudokibicōw ô podobnyj wielości uczestnikōw. Policyjōny zarŏz wziōnli przerywać praczkã jak tyż powiadōmiyli dinst jednostki, co pozwoł na sparcie mōndurowych z Bierunia, Mikołowa, Katowic i z Bielska-Biołyj.
Dziynki interwyncyji wachtyrzy prawa niy doszło do eskalacyje kōnfliktu, a możno nawet tragedyje. Mōndurowi zastawiyli auto, co nim jeździyli chopi z Czech. Fōnkcjōnariusze zabezpieczyli niybezpiyczne nŏczynie w wozidle. Znŏdniynte ôd mōndurowych przedmioty, keby były użyte, mogły prziniyś bardzo poważne rany. Na terŏz szandarzi niy majōm informacyji ô żŏdnych ôsobach poszkodowanych.
Skirz zdarzyniŏ policyjōny zastawiyli 6 chopōw, co im je ôd 22 do 33 lŏt. Piyńciu z nich to ôbywatele Czech, jedyn to miyszkaniec Tychōw. Policyjōny ôbsztalujōm uczestnikōw batalije i zbiyrajōm materyjõ dowodowõ, co podle nij bydōm przedstawiōne chycōnym ôbskażynia udziału w zbiegowisku jak tyż praczki. Zastawiyni stanōm przed prokuratorym, co uzdŏ ô jejich losie. Grozi im nawet 3 lata heresztu.
Dalszŏ tajla artykułu niżyj
Foto na wiyrchu: KMP Tychy