Ôpity kerowca wjechoł w radiowōz

Podle zgłoszyniŏ audi jechało cołkōm szyrokościōm jezdnie. Policyjōny pojechali, by jak nojwarcij zlokalizować i zastawić ôpitego kerowcy. Tyn straciōł panowanie nad autym i wjechoł w jejich radiowōz. 26-latek mioł bez 1,5 promila.

Informacyjõ ô tym, iże w rychtōnku Grodkowa mŏ jechać ôpity kerowca, ôficyr dyżurny ôdebroł we strzodã pŏrã minut po 19:00. To świadek, co jechoł za podyjzdrzanym audi dojzdrzoł niybezpiecznõ jazdã ôd kerowcy. Chop mioł jechać cołkōm szyrokościōm jezdnie i tworzōł ciynżke zagrożynie dlŏ inkszych używŏczōw drōg.

Na skŏzanõ drōgã pojechali szandarzi – jejich cyl, to było jak nojwarcij znojś i zastawić ôpisane we zgłoszyniu auto. Dozdrzeli je pŏrãset metrów za Grodkowym. Wachtyrze prawa zastawiyli radiowóz, żeby skōntrolować wōz. Wtynczŏs chop, co siedzioł za kerownicōm audi straciōł nad nim panowanie i wjechoł w radiowóz.

Jak sie pokŏzało, 26-latek w ôrganiźmie mioł bez 1,5 prōmila alkoholu. Do tego nigdy niy posiadoł prawa do kerowaniŏ. Pasażerka, co ś nim jechała, tyż była ôpitŏ. Maszina pokŏzała bez 0,5 promila alkoholu w jeji ôrganiźmie.

Dalszŏ tajla artykułu niżyj

Ôżarci kerowcy to je ryalne zagrożynie dlŏ inkszych. Tym razym uciyrpieli szandarzi, co pojechali ôpitego kerowcy zastawić ôd dalszyj jazdy. Na szczyńście jejich życiu i zdrowiu już nic niy grozi. Kerowca audi może terŏz ôczekować ôbskarżyniŏ spowodowaniŏ wypadku pod wpływym alkoholu. Grozi mu niy mynij aniżeli trzi lata heresztu.

Fot.: KPP Brzeg