Ôdpowiydź czornej łowce – poetycko riposta Fojermana
Napisoł ôtok chłop na Wachtyrzu ô „łowcach a zbiyraczach”, kaj tyż ô Fojermanie stoło. Jak żech tak zaczōn rozważować, to se myśla: nō, ja, czornōm łowcōm już mie kedyś możno keryś sprzezywoł, ale co jo tymu chłopu zebroł? To tak dlo błoznōw, a terazki moja prōba ôdpowiedzi czornej łowce:
Ôstało schylić głowa
Je na Ślōnsku poetōw moc,
I Wy ich znocie tyż pora możno,
Jo chca ô jednym spōmnieć, bo
Wiynkszego, myśla, żech niy poznoł.
Tyn, co Dantego przetłōmaczōł,
Co Burnsa pisoł po naszymu,
Ôn ślōnsko godka dźwigać zaczōn,
Światu pokozoł jōm całymu.
Dalszŏ tajla artykułu niżyj
Tyn co sam piyrszy nōm pokozoł,
Jako plyś w wiersze ślōnski słowa.
Chłop dużo robi, mało godo.
A mie ôstało schylić głowa.
Fojerman
Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.
