„Ôdłōnczōmy ladowanie Warszawy” – latosi Marsz Autōnōmije
Już 14 lipnia w Katowicach ôdbydzie sie coroczny Marsz Autōnōmije ôrganizowany ôd Ruchu Autōnōmije Ślōnska. Latoś hasłym marszu bydzie „Ôdłōnczōmy ladowanie Warszawy”.
– Już czas, by nasze dŏwki szły na nasze wydatki – padajōm ôrganizatorzi.
2018 rok to 98. rok ôd prziznaniŏ wojewōdztwu ślōnskimu autōnōmije. Marsz Autōnōmije to je nojsrogszŏ manifestacyjŏ w Polsce na rzecz realnnego loklanego regyrowaniŏ. RAŚ dopōminŏ sie wrōcyniŏ wojewōdztwu autōnōmije we modernyj formie, jak tyż stworzyniŏ Republiki Regiōnōw.
We radosnyj, familijnyj atmosferze Ślōnzŏcy przejdōm ulicami Katowic, żeby pokŏzać prziwiōnzanie do Ślōnska i jego interesōw, a tyż do lepszyj ekōnōmije.
Dalszŏ tajla artykułu niżyj
– Wierzymy, iże za swoje w naszym regiōnie mogymy gospodarować dobrze i szporobliwie.
Ruch zaprŏszŏ do udziału we marszu na swojim fanpejdżu na Facebooku:
– Jeźli chcesz, coby nasze dŏwki ôstŏwały na miyjscu, pragniesz lepszyj edukacyje dlŏ swojich dzieci, dinstu zdrowiŏ, co lyczy, sprŏwniyjszyj kōmunikacyje publicznyj, rozwoju regiōnalnyj kultury i gŏdki. Chcesz na Ślōnsku godnie robić i żyć. Przijdź na Marsz Autōnōmije!
Marsz zacznie sie w połednie na placu Wolności w Katowicach.