Nojbarzij wyczekowano gra je budowano na Ślōnsku
Na Ślōnsku je prawie budowano jedna z nojbarzij ôczekowanych ger kōmputrowych ôstatnich lot. Kole 450 ôsōb we wrocławskim CD Projekt Red robi nad tytułym Cyberpunk 2077, co je ôparty na planszowyj grze Cyberpunk 2020.
Chyba kożdy słyszoł ô CD Projekcie. To ôni stworzili seryjo ger ô Wiedźminie – adaptacyjo rōmanōw ôd Andrzej Sapkowskigo, co je uznowano za jedna z nojlepszych seryji ger we historyji. Teroz firma kōńczy projekt, co sie dzieje we blank inkszym świecie.
Cyberpunk 2077 bōł ôgłoszōny we 2012 roku i zaroz ôczy cołkigo gamingowego świata wejzdrzały na niego. We 2016 roku firma dostała ôd Norodowego Cyntrum Badań i Rozwoju 30 mln złotych na innowacyje, co potym były użyte przi budowaniu gry.
Ulepszōne były systymy animacyje, żeby lepij bōł zsynchrōnizowany ruch ust i miyńśni. Było tyż ulepszōne przechytowanie ruchu
Dalszŏ tajla artykułu niżyj
Gra je inspirowano filmym „Blade Runner”, japōńskōm mangōm i anime „Kōkaku Kidōtai” (angelski tytuł to „Ghost in the Shell”, we 2017 wyszoł amerykański film na jeji podstawie) i grami kōmputrowymi „System Shock” i „Deus Ex”.
W czyrwcu CD Projekt ôpublikowoł zapowiydź wideo gry, co w nim ujawniōł, że jedna ze głōwnych rōl we Cybrepunk 2077 bydzie grać Keanu Reeves, znōmy ze takich filmowych hitōw jak „Matrix” abo seryjo ô Johnie Wicku.
Prymiera gry je zapowiedziano na bezrok, 16 kwietnia. Niżyj możecie ôbejzdrzeć jeji dwie zapowiedzi wideo. Pozōr! Niy do dzieci!
