Niy bōjmy sie pedzieć „Niy!” – latosi Marsz Autōnōmije
W sobota, 13 lipca, w Katowicach ôdbydzie sie XIII Marsz Autōnōmije ôrganizowany ôd Ruchu Autōnōmije Ślōnska.
– Czymu nasz regiōn, kejś koło zamachowe polskij gospodarki, bōł wyeksploatowany i ôdstawiōny na bok? Możno bez to, że niy poradzymy stanowcz, głośno i kōnsekwyntnie pedzieć „Niy!” – pado Jorg Gorzelik, lider RAŚ.
2019 rok to 99. rok ôd prziznanio wojewōdztwu ślōnskimu autōnōmije. Marsz Autōnōmije to je nojsrogszo manifestacyjo w Polsce na rzecz realnego lokalnego regyrowanio. RAŚ dopōmino sie wrōcynio wojewōdztwu autōnōmije we modernyj formie, jak tyż stworzynio Republiki Regiōnōw.
We radosnyj, familijnyj atmosferze Ślōnzocy przejdōm ulicami Katowic, żeby pokozać prziwiōnzanie do Ślōnska i jego interesōw, a tyż do lepszyj ekōnōmije.
Dalszŏ tajla artykułu niżyj
– Latoś wojewōdztwu ślōnskimu ôbetniynto hned 40 mln zł we rōmach przekazowanyj ôd regyrōnku subwyncyje. Syjm Polskij Republiki ôdkozoł procedowanio projektu ôrdōnku ô ślōnskim jynzyku regiōnalnym. W kōńcu ministerstwo ôgłosiyło swōj ambitny plan budowy miyndzynorodowego banhofu, co bydzie ôbsugowoł Gōrny Ślōnsk kajś w polu pod małopolskim Ôlkuszym. Trzeba to wiyncyj, żeby pokozać swōj sprzeciw? – pyto Gorzelik.
Marsz zacznie sie w połednie na placu Wolności w Katowicach.