Na gōrnoślōnskich szportplacach, 8.04.2018

Zaczynōmy ôd hokeja, skuli tego, co we lidze czeskiej skōńczōły sie pōłfinały, a ślōnske HC Oceláři Třinec wlazło do finału po trzech latach przerwy. Pōłfinał, kery hokeisty ze Trzińca grali z HK Mountfield Hradec Kralove, bōł fest zaciynty…ôd czwortego szpilu. Jak my pisali tydziyń nazŏd, piyrsze dwa szpile we Hradec Kralove wygrało HC Oceláři Třinec. Trzeci szpil wygroł tyż gładko manszaft ze Trzińca 5-1, dziynki mocnymu szlagowi na poczōntku piyrszej tercyji, kiedy miyndzy trzeciōm a szōstōm minutōm strzelili 3 tory. Zanosiōło sie na leki szpacyr dlŏ Trzińca, ale ôd 4 szpilu wszyko sie fest wyrōwnało i kolejne 3 szpile kōńczōły sie dogrywkōma. Czworty i piōnty szpil wygrali hokeisty z Hradec Kralove, ale wczorej we dogrywce lepsi byli na szlynzuchach hokeisty ze Trzińca i to ôni radujōm sie ze awansu do finału.

Wyniki:
3 szpil: HC Oceláři Třinec – HK Mountfield 5-1 (3-0, 2-1, 0-0)
4 szpil: HC Oceláři Třinec – HK Mountfield 1-2 (1-1, 0-0, 0-0, dogr. 0-1)
5 szpil: HK Mountfiled – HC Oceláři Třinec 3-2 (0-1, 2-1, 0-0, dogr. 1-0)
6 szpil: HC Oceláři Třinec – HK Mountfield 2-1 (0-0, 1-0, 0-1, dogr. 1-0)

We finale czekŏ manszaft ze stolicy Moraw, HC Kometa Brno. Wczorej eksperci we ČT sport szpasowali, co przed finałym jedno je zicher: majstrym czeskej ligi we tym roku nie bydzie manszaft z… Czech, bo ô piyrszy plac bandōm sie bić manszafty ze Ślōnska i Moraw.

Trziniec zdowŏ sie mieć małŏ przewaga przed finałym, bo skuli bycia po gōwnej rundzie przed manszaftym z Brna, bydzie groł wiyncej szpilōw u siã.

Finały napoczynajōm sie 14 marca. Kolejne szpile 15, 18 i 19 marca. Wszyske szpile idzie ôglōndać live we ČT sport.

A co we gōrnoślōnskim fusbalu?

We polskej ekstraklasie bōło ôstatniŏ kolejka rundy podstawowej. Manszafty z Gōrnego Ślōnska już warciyj bōły zicher, co po niyj Gōrnik Zŏbrze bydzie grać we skupinie ô majstra, a Piast Gliwice ô utrzimanie.

Gōrnik groł ôstatni szpil we Poznaniu ze Lechym i przegroł go 3-1 (1-0). Tory dlŏ Poznania strzelili Kamil Jozwiak (45 minuta), Łukasz Tralka (80 minuta), Radosław Majewski (93 minuta), a dlŏ Zŏbrzŏ we 74 minucie Damian Kędzior.

Piast Gliwice zremisowoł u siã ze Bruk-Bet Termaica Nieciecza 1-1 (1-0). Tora dlŏ Gliwic strzelōł we 14 minucie Jakub Czerwiński, a wyrōwnoł we 90 minucie Vladislavs Gutkovskis.

Gōrnik skōńczōł runda podstawowŏ na 5 placu, a Piast na 13. Skupina ô majstra i utrzimaniy zaczynŏ szpile we nojbliższy weekend.

We drugej polskej lidze na drugi plac, kery dŏwŏ awans do eksraklasy, wskoczōł GKS Katowice.

Podbeskidzie Biylsko-Biołŏ – Gōrnik Łynczna 0-0
Wigry Suwałki – GKS Katowice 0-2
GKS Tychy – Chojniczanka Chojnice 2-2
Ruch Chorzōw – Ôlimpia Grudziōndz 0-0
Zagłymbie Sosnowiec – Ôdra Ôpole 1-0

GKS Katowice je 2, Ôdra Ôpole 7, Biylsko-Biołŏ 10, GKS Tychy 11, Ruch Chorzōw 18.

Do kōńca ôstało 9 kolejek.

We czeskej piyrszej lidze ôbudziōł sie Banik Ôstrawa. We środa zremisowali u siã ze liderym z Pilzna 0-0, a we sobota wygrali Zlinie ze Fastawym 2-0. Tory dla fusbalŏrzy z Ôstrawy strzelili Milan Jirásek we 5 miuncie i Denis Granečný we 91 minucie. Banik dalyj je ôstatni we lidze, ale mŏ już yno 2 punkty straty do placu, co je zicher na utrzimanie ich we ekstraklasie.

Tradycyjnie wiosynnie zagroł manszaft ze Karwiny. MFK grało u siã ze 1. FC Slovacko i zajś bōło 0-0.

MFK Karwina je 9, a Banik Ôstrawa 16.

We drugej lidze traci sie nadzieja na awans we Fotbal Třinec, kery na wiosna nie wygroł już 4 szpilu i ślecioł na 4 plac, a traci do drugego manszaftu aże 7 punktōw. Awansu może być poleku zicher za to Slezky Ôpawa.

Wyniki:
Fotbal Třinec – FK Usti nad Labem 1-1
FK Pardubice – Slezsky Ôpawa 0-1
Viktoria Zizkov – MFK Fridek-Mistek 1-2

Slezky Ôpawa je 1, Fotbal Třinec 4, MFK Fridek-Mistek 14.

 

Foto na wiyrchu: https://www.facebook.com/TrinecHokejoveSrdceSlezska/