Na gōrnoślōnskich szportplacach, 2.04.2018
Kōńczōm sie poleku rozgrywki hokejowe, to ôd nich zaczynōmy. We Polskej Hokej Lidze majstrym ôstoł GKS Tychy, kery we czwortek, 29 marca, wygroł czworty szpil z GKS Katowice i cołki finał 4-1. Pisali my ô tym wiyncej tukej.
Dobrze napoczły sie tyż pōłfinały we lidze czeskej dlŏ HC Oceláři Třinec. Manszaft z Trzyńca, kery we ćwierćfinałach wygrywŏ szpile yno u siã, tera mŏ ciynższe zŏdanie, bo grŏ ze Mountfield Hradec Králové. Manszaft ze Hradec Králové bōło we tabuli druge i bydzie grać wiyncej szpili u siã.
Piyrsze dwa szpile we miniōny tydziyń bōły we Hradec Králové i ôba wygroł HC Oceláři Třinec.
29 marca – Mountfield Hradec Králové – HC Oceláři Třinec 1-4 (0-1, 0-2, 1-2)
30 marca – Mountfield Hradec Králové – HC Oceláři Třinec 1-2 (0-2, 1-0, 0-0)
Tera HC Oceláři Třinec bydzie grać dwa szpile u siã i jak utrzimŏ seryjŏ ze ćwierćfinałōw to już we strzoda bydzie mōg fajerować awans do finałōw. Jak mŏcie ČT sport, to wszystke szpile ôd HC Oceláři Třinec mogecie ôglōndać live: 2.04 ô 16.20 a 3.04 ô 17.00.
Dalszŏ tajla artykułu niżyj
Fusbal tyż bōł fest udany dla ślōnskich manszaftōw we ligach czeskych.
We piyrszej lidze ôdżōły nadzieje we Ôstrawie. Banik wygroł piyrszy szpil na wiosna ze Vysočinōm Jihlava 3-1. Piyrszego tora dlŏ Banika strzelōł Milan Baroš we 31 minucie. Po pauzie we 50 minucie wyrōwnoł Marin Popvić. Nie podłōmało to fusbalŏrzy ze Ôstrawy i we 72 na 2-1 tora strzelōł Robert Hruby. We 80 minucie kibicōw uspokojōł Vacla Prochazka, kery strzelōł tor na 3-1. Banik dalyj je ôstatni, ale w kōńcu poradziyli wygrać jakiś szpil i kibice zajś majōm nadzieja, co piyrszŏ liga ôstanie we Ôstrawie.
Tradycyjnie na remis zagrali fusbalŏrze ze Karwiny. MFK groł we Brnie ze Zbrojovkōm i bōł remis 0-0. Karwina je 9.
We II lidze czeskej ślōnske manszafty grały tak:
Hradec Kralove – Fotbal Třinec 5-1
Slezsky Opawa -SC Znojmo 3-0
MFK Frydek-Mistek – MAS Taborsko 1-0
Slezsky Opawa je 1, Třinec 3, a Frydek-Mistek ôstatni.
We polskej ekstraklasie punkty zajś straciōł Gōrnik Zŏbrze. Fusbalŏrze ze Zŏbrzŏ grali u siã ze Sandecjōm Nowy Sōncz. Piyrszego tora strzelyli goście. We 55 minucie zrobiōł to Wojciech Trochim. We 74 minucie przipōmnioł ô siã Igor Angula i strzelōł tora na 1-1. We 78 minucie we Zŏbrzu uwierzyli we wygranōł, bo tora na 2-1 strzelōł Dani Suarez. Nadzieje trwały krōtko, bo we 81 minucie wyrōwnoł Aleksander Kolev. Gōrnik je dalyj 4.
Piast Gliwice dzisiej bydzie grać we Płocku ze Wisłōm.
We I lidze polskej gōrnoślōnskie manszafty grały tak:
Chojniczanka – Ôdra Ôpole 2-1
GKS Tychy – Ruch Chorzōw 2-0
GKS Katowice – Zagłymbie Sosnowiec 1-0
Olimpia Grudziōndz – Podbeskidzie Bielsko-Biŏła 0-0
GKS Katowice je 4, Ôdra Ôpole 6, Bielsko-Biŏła 9, GKS Tychy 12, a Ruch Chorzōw ôstatni.
Foto na wiyrchu: Banik Ôstrawa / Leszek Markowski
