Miśki, hoolsy i inksze hajoki… – 08.10.2018 [Ślōnski Fusbal, film]
Transfer last minute z Italije prosto do Katowic! Tym razym to niy fusbalista, chocioż z fusbalym bōł ôn blisko powiōnzany. Keby ludzi z jego branży brali do telewizyjnych show wytańcowołby już niyjedna gwiazda i zrobiōł pora celebryckich yntōw ze „splashym”. Mōmy czym sie asić! Ślōnsk wzbogaciōł sie gynau ô istnego majstra w swoim fachu, a dokładnił zgarnōł go katowicki hereszt śledczy (jeszcze niy wiadōmo eli transfer je definitywny).
Paweł M. ps. „Misiek” bōł szefym hoolsōw Wisły Krakōw znanym z ciepniyncio nożym w Dino Baggio, ale jego kibolsko-chacharski CV je bogatsze. Z perspektywy ślōnskigo fusbalu chycyni panoczka Miśka z Krakowa to mono ni ma jakoś nojważniejszo informacjo, ale do nikerych sie liczy… Bezmałaś kibole Ruchu i Wisły już se „niy przajōm”, bo w sprawie Pawła M. policjantōm pōmōgła spowiydź dwōch „Psychofanōw” Ruchu. I tera pierōn wiy czy je „kosa” czy zgoda. Boroki hoolsy niy wiedzōm po lekku z kim do lasa sie umawiać na grziby a z kim na ustowki.
Poza tym w ślōnskim kibolskim światku na szczynści nudy. Nawet na ôstatnim szpilu Piasta z Gōrnikym ôbyło sie bez haje. Mono beztōż że piastowski ultrasy sztyjc bojkotujōm szpile swojij ekipy, ôdkōnd po przerwanych wiosynnych derbach miasto i klub wkludziyły antykibolowo polityka? Kibole na Piasta niy chodzōm, ale klub mo sie dobrze. Brawo Glywice.
Grzegorz Buchalik – etnolog, historyk, felietōnista, fusbalista. Kludzi bloga Ślōnski Fusbal:
https://www.facebook.com/SlonskiFusbal/
Dalszŏ tajla artykułu niżyj
