Jastrzymbie: Ze sklepu do heresztu
Nojbliższe 15 lŏt może przepyndzić za krŏtami 37-latek, co je podyjzdrzany ô raub rozbōjniczy. Miyszkaniec Wodzisławia porwoł w jednym z jastrzymbskich marketōw alkohol. Potym, jak pracownik ôchrōny prōbowoł go chycić, ôn go proł i targoł. Cołke zdarzynie widzioł 59 lŏt stary chop, co podlecioł do ôchrōniŏrza i trzasnōł go piyńściōm w gymbã. Chopi usłyszeli już ôbskarżynia, a ô jejich dalszym losie uzdŏ prokuratōr i gyricht.
We sztwŏrtek, kole godziny 10:30 dyżurny jastrzymbskij kōmyndy posłoł patrol na ul. Rybnickõ, kaj podle zgłoszyniŏ, w sklepie miała być szarpaczka miyndzy pracownikym a chopym, co porwoł tŏwŏr. Na placu policyjōny z jastrzymbskij patrolōwki dozdrzeli pracownikōw ôchrōny trzimiōncych agresywnego chopa. Pokŏzało sie, iże 37-latek ukrŏd alkohol i uciykoł ze sklepu. Jak ôchrōniŏrz za nim polecioł, to chop wziōn sie z nim targać i proł go po cołkim ciele. Cołke zdarzynie widzioł 59 lŏt stary chop, co podlecioł do ôchrōniŏrza i trzasnōł go piyńściōm w gymbã.
Agresorzi byli chycyni i dokludzyni do kōmyndy. Skuli tego, iże w czasie ôstatnij złodziejskij eskapady 37 lŏt stary rabsik użōł przemocy, ôdpowiy za raub rozbōjniczy. 59-letni miyszkaniec Rybnika usłyszoł ôbskarżynie naruszyniŏ niytykalności cielesnyj ôchrōniŏrza. Jedyn i drugi już mieli problymy z prawym. Jejich dalszy los leży w rynkach gyrichtu.
Zdrzōdło: KMP Jastrzymbie-Zdrōj
Dalszŏ tajla artykułu niżyj
