Godōw: Na kole zamiast cugym
We Godowie naszykowali „Zieleźny Szlak do Kołōw”. Mianuje sie ta drōga do kołōw „zieleźno”, bo wiedzie po beszōngach, kaj piyrwej jeździōł cug. Prziszły czasy, że cugi przestały jeździć, glajzy poszły na złōm, a beszōngi zarosły krzami. Terazki ludzie przi polsko-czeskij granicy uznali, co po starych beszōngach bydōm jeździyli na kołach. Cołko sztreka mo wiyź z Godowa kole Wodzisławia, bez Jastrzymbi, Zebrzidowice, aże do Petrovic u Karviny a Karviny, po czeskij strōnie granice. Na dzisiej naszykowali praje 3 km tej drōgi do kołōw, na bezrok majōm budować we Jastrzymbiu, a cołko sztreka mo mieć kedyś bezmała 28 km.
A co Wy myślicie ô takij pomianie starych beszōngōw z glajzami na drōgi do kołōw? Mie sie to podobo, ale jo bych możno poszoł dalij a pozawiyroł wszystki beszōngi z cugami, a kozoł bych tam ludziōm na kołach jeździć. Złōmiorze miały by co sprzedować, Koleje Ślōnski niy musiały by sie starać, że cugi jadōm za niyskoro, luft bōł by czyściejszy. Cołki świat by ô nas godoł, że mōmy najwiyncyj drōgōw do kołōw. A jacy ludzie byli by zdrowi. Yno, czy tych kołōw dlo wszystkich styknie?
Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.
Dalszŏ tajla artykułu niżyj
