Farmaceuta amatōr handlowoł narkotykami i sterydami

Szandarzi z Gliwic, społym ze policyjōnami kōmyndy wojewōdzkij w Katowicach, przekludziyli akcyjŏ przeciwko handlyrzowi niyprzizwolōnymi postrzodkami. W jednym z gliwickich pōmiyszkań, ôkrōm narkotykōw, znŏdli niylegalny „skłŏd apteczny” z bez pŏrōma tysiōncami sztuk ôbpakowań rozmajtyj zorty farmaceutyków i sterydów. Sprawa bydzie sie rozwijać.

23 kwietnia przed połedniym do jednyj z kamynic w gliwickij dzielnicy Szobiszowice weszli kryminalni. We nojmowanym ôd 35-letnigo pyskowiczana pōmiyszkaniu w rejōnie ulice Tarnogōrskij znodniynto było pŏrã tysiyncy sztuk rozmajtyj zorty anabolikōw we formie pulwrōw, pilōw i szpricōw.

Na szlak niylegalnego procederu policyjōny wpadli przi robocie ôperacyjnyj, w tym rozpoznaniu „rynku”. Narkotyki we formie bez 100 gramōw amfetaminy, myńszych wielości marihuany, narkotyku MDMA jak tyż niylegalne postrzodki farmaceutyczne (w srogich wielościach) zarekwirowano i przetransportowano do gliwickij kōmyndy. Społym ze tŏwŏrym trefiōł tam tyż ôbrotny pyskowiczōn.

Sprawa kludzōnŏ je ôd prokuratury w Gliwicach. Wszyjske zabezpieczōne specyfiki ôstanōm pozornie przebadane w laboratorium kryminalistycznym – trza terŏz uzdać, jake prawie substancyje sōm w ôbpakowaniach. Podyjzdrzane je to, iże czyńść zarekwirowanego tŏwaru to nowe, prōzne ôbpakowania na postrzodki sterydowe. Ôpiniijŏ bydzie za podstawã do uzdaniŏ, czym gynau handlowoł dōmorosły biznesmyn i farmaceuta amatōr.

Za handel narkotykami jak tyż postrzodkami farmaceutycznymi chycōnego czekajōm terminy i rozsōndek sōndowy, grozi mu nawet 10 lŏt heresztu.

Fot. na wiyrchu: KMP Gliwice