Eko-ławka we Radlinie
We cyntrum Radlina, na pl. Radlińskich Olimpijczyków stanyła ławka, na kerej idzie ôdpoczōnć i naładować we tyn czasie bateryje. Eko-ławka dziynki panelōm solarnym wytwŏrzŏ sztrōm przidajny do naładowaniŏ telefōnu abo tabletu. To jedna ze zwyciynskich propozycyji w piyrszyj edycyji budżetu ôbywatelskigo we Radlinie.
Podzimym łōńskigo roku, z propozycyjōm stworzyniŏ ławki solarnej w Radlinie zgłosiyła sie grupa miyszkańcōw, przi skłŏdaniu antragu w rōmach debiutanckiej dlŏ Radlina edycyje budżetu ôbywatelskigo. W czasie welowaniŏ bez miyszkańcōw projekt zyskoł uznōnie i ôstoł zaplanowany do ryalizacyje w 2018 roku. Ławka finalnie stanyła wczorej w cyntrum Radlina.
Tyn miastowy mebel wyposażōny je w panel fotowoltaiczny, kery ynergijõ słōnecznõ zamiyniŏ na sztrōm. Idzie dziynki tymu podładować swōj telefōn abo tablet. Ławka ôbsługuje tyż masziny z ładowarkōm indukcyjnōm. Ekstra ôstała wyposażōnŏ we sztyry stojaki na koła jak tyż instrukcyjõ w alfabecie Braille’a. Produkcyjōm ławki zajōnła sie fyrma Smartta z Krzepic.