Dolnoślōnskie przewodniki abo lekcyjŏ polskości

Co tyż żech sie przewiedzioł ôd przewodnikōw na przileżytość mojij rajzy po ziymi kłodzkij: po tych roztōmajtych grubach w Złotym Stoku, Kletnie i inkszych atrakcyjach? No ja:

Kobiyty w Polsce erbły pōłne prawa we 1918 roku, tōż miyndzy 1918 a 1921 tyż robiyły sam na grubie…
… chociŏż ta ziymia je przi Polsce ôd 1945 roku.

Grubōm regiyrowali Prusŏki, bo to bōł pruski zabōr…
… chociŏż Ślōnsk niy bōł pod zaborym, bo jak Prusŏki, Austryjŏki a Rusy dŏwali sie do zebiyraniŏ Polski, to ôn już tak ze 400 lŏt niy bōł przi Polsce.

Po piyrszyj wojnie były sam powstania ślōnskie….
… chociŏż trzecie powstanie zaszło nojdalij kajś pod Krapkowice na Gōrnym Ślōnsku, a sam je Dolny Ślōnsk.

Dalszŏ tajla artykułu niżyj

I mōmy sam polskie gōry, polskie skały, polskie jaskinie, polskie minerały, polskie lasy, polsko piykno prziroda…
… chociŏż ta Polska je sam ô ‘45 roku, po Niymcach, po Prusach, po Czeskij Korōnie we Cysarstwie, i tak dalij. I te skały sam stoły, jak jeszcze ani Polŏkōw, ani Słowianōw, ani człowieka sam niy było.

I tak Polska, Polska, Polska, kŏżdy dziyń, po piytnoście-dwajścia ôsobōw na grupa, grupa za grupōm, cołki sezōn, rok za rokiym.

Tōż wiycie, przewodniki mi to wyerklerowali i tyż już znōm ta prŏwda. Terŏz to richtich żech je polski patryjota.