Dejcie pozōr na Ślazaków
Nojwiynkszyj etnicznyj myńszości ze spisu 2011 niy bydzie miyndzy ôpcyjami do klikniyńcio. Niy bydzie – bo przeca niy ma jij na wykozie norodnych i etnicznych myńszości we ôrdōnku. A niy ma – bo trzi Syjmy ôd tego czasu patrzały, coby jij tam niy wkludzić. 800 tysiyncy deklaracyji, ôbywatelski projekt poprowki ôrdōnku, pora projektōw partyjnych, sygnały ze Unije – trza sie było trocha narobić, coby to wszysko poôdciepować.
Mosz ale, ôbywatelu, swoboda. Możesz se kliknōnć na “inna” i sōm wpisać, co ci sie ino widzi. Chociożby to była norodność ślōnsko. Czego chcesz wiyncyj? (Jo bez przikłod bych chcioł, coby państwo do porzōndku porachowało swojich ôbywatelōw. Ale jo zawdy bōł wymyślaty…)
Zno fto, jakie sōm spisowe prawidła przi powpisowanych felerach? Przeca bydymy sie spisować sami, na tastaturach i mobilniokach, na zicher niyjedyn sie przi tymu chachnie. Jak rachowane sōm ôdpowiedzi do narodowości: francuzka, angielksa, protugalska? Poprowio to fto? Niy bydzie aby tak, iże pokoże nōm sie moc nowych norodności: takich na pora, poradziesiōnt, abo i poraset ludzi?
Toć, szłoby zaś (jak przi spisie 2011) dać szyroki wykoz z norodnościōm do ôbranio. Ale tyn systym niy ma dobry, bo dużo snadnij sie przi nim pokazujōm problymy z mitycznōm monoetnicznościōm Nojświyntszyj Republiki.
Dalszŏ tajla artykułu niżyj
Ślōnsko norodność je fest zocno i niy ciupnōłbych sie na żodno inkszo, ale jedno trza pedzieć: je darymno do zapisowanio. Tōż richtich idzie sie starać, iże hneda nōm przibydzie moc ôbywatelōw z nowymi norodnościami: Slązaków (sląska), Ślōnzokōw (ślōnsko) i Ślonzaków (ślonska). Abo tych nojgorszych – Ślazaków (ślaska), co sōm klang majōm taki, że strach. Styknie ino źle kliknōnć jaki knefel i zaroz “narodowość inna: śląska” bydzie mieć ôsoba mynij.
Tōż jak sie pokożōm wyniki spisu, to dejcie pozōr, co tam za nacyje stojōm na spodku tabulki. Abo lepszy – dejcie pozōr przi wkludzaniu swojij ôdpowiedzi. Ślōnzoki traciyły sie już skuli wojyn, moru, volkslist i rehabilitacyjnych akcyji. Gupie by było, jakby my sie teroz potraciyli skuli literōwek.
Podziynkowania do Jacka Zięby @jacek_zieba za tweet z pōmysłym na tekst.
Przidane 03/04: Pora dni po napisaniu felietōnu pokozały sie informacyje ô tym, iże systym dowo dorady po wkludzyniu piyrszych liter, tōż (na szczyńscie) niy idzie zrobić takich felerōw. I richtich – styknie napisać “ś” i zaroz “śląska” sie pokazuje. Tela dobrze!
Parafrazując: “nie ważne co wpiszemy, ważne co policzą”
A ja się będę śmiał jak w oficjalnych wynikach nie będą podawali szczegółów deklaracji. Czyli jeśli padł wybór na narodowość “inną”, to podadzą “INNA” i tyle. Nie wchodząc w szczegóły, co dalej deklarowano (śląska, islandzka, szwedzka, baskijska itp.). W ten elegancki sposób W OGÓLE w oficjalnych wynikach nie pojawi się “narodowość śląska”, a po prostu milionowa “NARODOWOŚĆ INNA”.
A jo by się śmiol keby Ślōnzocy się wnerwili i we jeszcze srogszyj miyrze podali identyfikacjo tuplowanõ ślōnsko-niymiecko. W gruncie i tak ôna je, bez nij niy byłoby ślōnskojści jakõ dziś znōmy. Ślōnzok je jak szmaragd, moc silny twardy, kuli swojyj złożonyj struktury i to cza docyniac. Jak wszyjstko co niymiecke i pod niymiecke klasyfikowane je dyskryminowane we tym sztaacie, no krōm niymieckich €€€€€€. Jak niy szło po dobroci bez otatnie 10 lot, to czas na rebelijo. Statystyki bannōm i tak zaniżone kuli braku możliwości ôbranio direkt narodowosc “śląska”. Jak robić szum , to do porzōndku. Za polsko grupa etnograficznie się sklasyfikować nie dōm, bo w Polsce, to Zech był ino pora razy na jakichś ausflugach. * Ślōnsko, to nie Polska, ale i Ślonsko i Polska tworzōm RP. Schuldigung ale nawet Powstańce Polske ôdrōżniali Ślōnski Kraj ôd Polski
No to trza uświadamiać jak wpisywać: narodowość inna: śląska