Chaja na manifestacyji nacjōnalistycznyj w Katowicach
Wczorej, 6 mŏja, polske strzodowiska nacjōnalistyczne prōbowały przejś w Katowicach z placu Sejmu Ślōnskigo pod dynkmal Powstańcōw Ślōnskich. Potym miała tam zagrać grupa ô mianie Nordica i mioł być piknik. Jak urzyndnicy sie dowiedzieli ô programie, to niy dali zwōl na kōncert. Marsz durch bōł legalny, tōż nacjōnaliści wōl niy wōl chcieli przemaszerować bez Katowice. Jak wychodziyli na ulicã Jagellōńskõ, to na drōdze stanyli im antyfaszystowscy kōntrmanifestańciŏ. Tych, co siedzieli na ulicy, policyjŏ wziōnła snosić na bok. Zastawiōnych było 9 ôsōb, a 35 wylegitymowanych.
Skuli tego, iże na marszu pojawiyły sie hasła i symbole faszystowske i nazistowske, a tyż bez to, iże miyndzy ôbiyma grupami było niybezpiecznie dlŏ zdrowiŏ i życiŏ ludzi, prezydynt Katowic, Marcin Krupa, rozwiōnzoł marsz.
Zarŏz wziōn interwyniować na Twitterze poseł Robert Winnicki i pisoł do Joachima Brudzińskigo, Ministra Spraw Wewnyntrznych, iże „1. Policja w Katowicach ochraniała dziś lewaków blokujących manif.ku czci Powstańców Śląskich 2.Brutalnie interweniowała wobec uczestników marszu a 4 zatrzymała. Wszystko przez to, że prezydent Krupa (kandydat PiS) kazał rozwiązać marsz!” Dostoł ale ôdpowiydź, co jij sie pewnikym niy spodziywoł.
– Panie Pośle gdyby Pan wpłynął na organizatorów narodowych demonstracji, aby skuteczniej eliminowali ze swoich szeregów idiotów eksponujących faszystowskie i nazistowskie symbole to @PolskaPolicja nie musiałaby interweniować.A Ruch Narodowy nie byłby kompromitowany w oczach Polaków – ôdpisoł minister.
Dalszŏ tajla artykułu niżyj
Policyjŏ sfilmowała i sebrała dokumyntacyjõ z ôbōch dymōnstracyji i prześle materyje do prokuratury, a ta przejzdrzi je i uzdŏ, jeźli potrzebne bydōm kroki prawne.
Fotografijŏ na wiyrchu: KMP Katowice