Bronisław Wątroba: Brif do Dzieciōntka – XII.2018
Brif do Dzieciōntka – XII.2018 
Dzieciōnteczko, wiysz, dlo siebie
Chca ô zdrowie prosić Ciebie
I ô szczyńście familiji
Dyć niy robia z tym mecyji
Chca Cie prosić tyż, kej idzie
Ô to co ze godkōm bydzie
Chca Cie prosić byś wspierało
Tym Ślōnzokōw radowało
Wiysz Dzieciōntko, sōm rymuja
Bibljo już parafrazuja
Mono życio mi wystyknie
Coby skōńczyć, dlō mie piyknie
Dyć czy inksi przeczytajōm?
Czy godka we zocy majōm?
Gowy za to niy położa
Yno tyn brif szkryfnōńć woża.
Dzieciōnteczko, prosza Ciebie
Tu, na ziymi, choć żeś w niebie
Prosza coby Kościōł wspiyroł
Ślōnsko godka, Bōg zaziyroł
Bōg zaziyroł na dziedzina
Naszo, ślōnsko, z wsparciym Syna
Coby wiara po naszymu
Słychać było u wrōt Rzymu
Medykuja, kōncept łazi
Mi po gowie, niych niy razi
Niych Ślōnzokōw pokupluje
Niych Cie richtig uraduje
Ślōnski Konkurs Recytacji
Strof Biblijnych – zdo, w tym racji
Niy trza szukać – kejby stało
Godka z wiarōm kuplowało
By uczyli sie szkolorze
Wiary, godki – Szczyńść im Boże
Twōrcy strofy zaś tworzyli
Co ze duszy swoji wziyli
Z czasym Bibljo by my mieli
We djalektach ślōnski szteli
Skarbym wiary, skarbym godki
Tōż brif śla Ci niy przipodkym
Dzieciōnteczko, czy pōmożesz?
Wiym, Ty wszysko przeca możesz
Tōż Cie prosza ô to prawie
Wspiyrej ślōnskość we ty sprawie.
Bronisław Wątroba
Szkryflōm se ta Bibljo swojōm rymowankōm i to tyż wydowōm. Do kōńca 2020 chciołbych szkaryfnōńć tak cołki Nowy Testamynt i Ksiynga Rodzaju. Jakby pod patronatym gōrnoślōnskego Kościoła zaistnioł Ślōnski Kōnkurs Recytacji Biblijny, to zdo mi sie że i naszo godka, i wiara byłyby we proficie. Przi taki ideji mogłoby sie tyż pokozać wiela tekstōw biblijnych w roztomajtych djalektach ślōnskich. Toż stōnd tyn mōj brif.
Tytułowŏ wycinanka: Marek Wacław Judycki