Bielsko-Biołŏ: chycyni za rozbōj
Policyjōny z Bielska-Biołyj zastawiyli 27-latka i jego 22-letnigo spōlnika. Starszy z chopōw je podyjzdrzany ô rozbōj, groźby i poprzniynie statku. Ôba ôdpedzōm za napaść na interwyniujōncych wachtyrzy prawa. Zastawiyni sōm już po ôbskarżyniu. Zgodnie z decyzyjōm gyrichtu, 27-latek przepyndzi w hereszcie nojbliższe miesiōnce.
Do zdarzyniŏ doszło na bielskij ul. Trzech Dyjamyntōw. Chopi ôba piyli alkohol. W jednym mōmyncie starszy z nich napŏd i ôkrŏd 43-letnigo bielszczana. Sprŏwca ciynżko sproł pokrziwdzōnego. Jego łupym padły dokumynta i mobilniŏk. Groziōł tyż świadkowi zdarzyniŏ, kery stanōł w ôbrōnie ôfiary, a niyskorzij wybiōł szybã w dźwiyrzach pobliskigo bloku.
Świadkowie zaalarmowali ô tym policyjōnōw. Chwilã niyskorzij mōndurowi zastawiyli sprŏwcōw. Ôba byli wyjōntkowo agresywni. Żeby udarymnić zastawiynie, napadli interwyniujōncych szandarōw. Szarpali sie, ôbrażali i prōbowali uciyc. Podszukowanie alkōmatym wykŏzało, iże ôba byli ôpici. Mieli ôd 1,5 do 2 prōmilōw alkoholu we ôrganiźmie. Zastawiyni trefiyli do policyjnego heresztu. Na nastympny dziyń usłyszeli ôbskarżynia. Starszymu z nich za przestympstwa te grozi terŏz do 12 lŏt za krŏtami. Bielski gyricht, na wniosek śledczych, podjōn już decyzyjõ ô jego tymczasowym heresztowaniu. W przeszłości bōł ôn już spisowany za przestympstwa przeciwko życiu. Jego 22-letni spōlnik ôdpowiy za naruszynie niytykalności cielesnyj i zniywŏgã policyjōnōw. Grozi mu do 3 lŏt heresztu. Prokuratōr ôbjōn go policyjnym dozorym.
Zdrzōdło: KMP Bielsko-Biołŏ