Berło grubiorza – 05.11.2018 [Ślōnski fusbal, filmik]
Górnik dostowo wklupane 4:0 na Legii. Ôdechciywo sie godki ô fusbalu, pra? Kibice Grubiorzy, niy starejcie sie! Na pocieszyni mōm do Was historio inkszego grubiorza, tym razym niy ze Zobrzo a z Jastrzymbio, kery gynau zaliczōł niymały szportowy sukcys, ale po kolei…
2012, KWK Knurōw. Szpetny wypadek na dole. Maszina wciōngo synkowi rynka, słyszy jak szczyrkajōm kości, ôd jego reakcji zoleży terozki jego życi… Keby wtedy Łukasz Miśkiewicz niy bōłby ôdruchowo ôszperowoł sie i praktycznie utargoł se rynka, maszina zemlołaby go cołkigo. Straciōł rynka, ale ôbstoł. Tera ofyn godo, że uratowoł go anioł. Bezmałaś już 3 dni po wypadku Łukasz szukoł do sia szportu. Amp fusbal wtedy dopiyro sie w Polsce rodziōł tōż Łukasz przody chyciōł sie klasycznego fusbalu w rezerwach GKSu Jastrzymbi. Groł w ataku, ale szterowało go to, że inksi boli sie szpilać ś nim na ôstro. Hneda jego drużyna sie rozônaczyła, ale ôn dostoł nowo szansa i zaczōn przigoda z amp fusbalym. Zaczōn trynować za tormana, bo to jedyno pozycjo do jednorynkigo w tym szporcie (grocze z pola sōm po amputacji jednej nogi i tyrajōm na berłach).
Latoś Łukasz znod sie w reprezyntacji Polski na Mundial razym z trzema kōmplami z Kuloodpornych Bielsko-Biała, ampfusbalowego wicemajstra Polski. Synki z Meksyku prziwożōm 7. plac, chocioż byli już (jak to ôni padajōm) jednōm nogōm w pōłfinale. Sztwierćfinał z Angolōm przegrali dopiyro po dogrywce i elwrach.
Taki je szport. Jedne je pewne. Telko porażka yno ich zmotywuje. Berła w rynce i jadymy!
Dalszŏ tajla artykułu niżyj
Grzegorz Buchalik – etnolog, historyk, felietōnista, fusbalista. Kludzi bloga Ślōnski Fusbal:
https://www.facebook.com/SlonskiFusbal/