Banōm na wōnskich glajzach z Rud do Rybnika
W tym tydniu sztartły roboty swiōnzane z wrōcyniym linije bany na wōnskich glajzach na kōncku ôd granice Miasta Rybnika do sztele przesiadkowyj Stōdoły.
Bana na wōnskich glajzach to jedna z nojsrogszych atrakcyji regiōnu – mŏ dugõ tradycyjõ, a sztela w Rudach je na Sztrece Zabytkōw Techniki. Rybnik zaczōn starania ô przedużynie tyj linije banowyj już we łōński rok. Jednak ôgłoszōne wtynczŏs przetŏrgi na budowã banhofu i glajzōw ôstały ôdkŏzane skuli za wysokich cyn słożōnōych ôd ôferyntōw w relacyji do zaplanowanego ôd miasta budżetu na tyn cyl. Zadanie ôstało przekŏzane do Rybnickich Dinstōw Kōmunalnych, kere potajlowały roboty swiōnzane z inwestycyjōm. Dinsty kōmunalne sprawiyły elymynta małyj architektury a roboty budowlane sprawi fyrma Inżbud, ôbranŏ wczaśnij w przetŏrgu.
– Zaangażowanie miasta w robotã wynikŏ z chyńci użyciŏ i rozwijaniŏ potyncjału turystycznego Rybnika. Bana na wōnskich glajzach stanie sie barzo atrakcyjnym dopołniyniym ôferty miasta, co dō nij nŏleżōm: rzyka Ruda z możebnościōm ôrganizowaniŏ spływōw kajakowych, ciekawe sztreki kołowe i Morze Rybnicke z możebnościōm łowiyniŏ ryb abo żeglowaniŏ. W prziszłości te wszyjske aktywności mogōm sie perfekt dopołniać i stworzić atrakcyjnõ propozycyjõ niy ino dlŏ miyszkańcōw ale tyż dlŏ weekendowych turystōw – podkryślŏ prezydynt Rybnika Piotr Kuczera.
Dalszŏ tajla artykułu niżyj
Inwestycyjŏ bydzie polygała na ôdbudowaniu kōncka bany na wōnskich glajzach na dugości kole 700 m bez ôdbudowã glajzōw, jak tyż perōnu na banhofie Stōdoły, społym z mōntażym wiaty perōnowyj, zadaszyniŏ kołowego jak tyż elymyntōw małyj architektury takich jak ławki, hasiŏki, lampy. Roboty zajmnōm kole dwa i pōł miesiōnca. Planowanŏ cynŏ cołkij inwestycyje to kole 1,5 mln zł.
Zdrzōdło i fotografije: UM Rybnik