3.000.000 byzuchōw na portalu Wachtyrz.eu!

Niedugo nasz 4. gyburstak (napoczynali my we lutym 2018), a dzisiej zanotowali my 3.000.000 byzuch na naszej strōnie. DZIYNKUJYMY, że nŏs czytŏcie! We ôstatnich miesiōncach na naszej strōnie je czytanych strzednio 75 tauzynōw tekstōw na miesiōnc.To przi naszyj ôbniżonej aktywności (Wachtyrz to durch nasz szpas po “normalnej” robocie, a tej ôstatnio kupa) je blank dobry wynik.

Do dzisiej ôpublikowali my 3293 artykuły, kere napisało 81 autorōw, z czego 43 % bōło po ślōnsku, 54% po polsku, 3% cuzamyn po niymiecku, czesku i angielsku.

Dziynki Waszej finansowej pōmocy doszli my do sytuacyje, kaj mogymy co miesiōnc 5 nojbarzij poczytnym autorōm wypłacić symboliczne hōnorarium (po 100 złotych) a być spokojni ô ôpłaty serwerowo-dōmynowe.

Naszŏ misyjŏ mōmy durch takŏ samŏ:

Dalszŏ tajla artykułu niżyj

“Informacyjŏ mŏ siyła. Siyła pokazowaniŏ prŏwdy. Siyła zmiynianiŏ świata naôbkoło nŏs. Siyła łōnczyniŏ ludzi. Beztōż ôtwiyrōmy Wachtyrz.eu – ślōnski serwis z informacyjami.
Wachtyrz.eu je lokalny. Dŏwŏ plac, coby sie trefić. Dŏwŏ nŏrzyńdzia, coby znojś partnyra do geszeftu, usugi, do spōlnego działaniŏ sam-tukej, u nŏs.
Wachtyrz.eu je regiōnalny. Zasuwŏ granice, co sōm w gowach. Niy zaglōndŏ na wojewōdztwa i kraje. Stŏwŏ na pozycyji ślōnskij – i żŏdnyj inkszyj.
Wachtyrz.eu je globalny. Toć, dōm je ważny, ale niy idzie durch siedzieć w dōma. Wachtyrz spōminŏ, co sōm my czyńściōm Europy i świata. Co Ślōnsk to je Europa i świat.
Wierzymy, iże potrzebny je ślōnski serwis z informacyjami – ciekawy, przidajny, po blisku – beztōż ôtwiyrōmy Wachtyrz. Patrzymy, coby była sam siyła informacyji, ale tyż coby zrobić ś niego sroge nŏrzyńdzie, co poradzi postarać sie ô lokalne, regiōnalne i globalne ślōnskie sprawy.
Bydź z nami. Spōlnie użyjymy dobryj siyły ôd informacyje.”

Tōż liczymy, że bydziecie regularnie zaglōndać na naszŏ strōna www.wachtyrz.eu a w miara możliwości tyż cojś ciekawego na ślōnske tematy napiszecie abo nŏs inakszyj wesprzecie.