Ślōnskŏ Partyjŏ Regiōnalnŏ przedstawiyła liderōw list do syjmiku
Ślōnskŏ Partyjŏ Regiōnalnŏ we welōnku do Syjmiku Wojewōdztwa Ślōnskigo stawiŏ na ôbeznanych samorzōndowcōw, cyniōnych pracownikōw naukowych i gyszefciŏrzy ze sukcesami. 11 lipnia 2018 r. zaprezyntowała liderōw list we sztyrech gōrnoślōnskich rejōnach welōnkowych wojewōdztwa ślōnskigo.
REJŌN WELŌNKOWY NR 2
(Katowice, Mysłowice, Tychy, krysy: bieruńsko-lyńdziński i pszczyński)
Jorg Gorzelik – dr historyje sztuki, pracownik Uniwersytetu Ślōnskigo, ôd roku 2003 szef Ruchu Autōnōmije Ślōnska, ôd roku 2010 radny wojewōdzki, w latach 2010-2013 czōnek zarzōndu wojywōdztwa ślōnskigo, terŏźnie szef klubu radnych Ślōnskij Partyje Regiōnalnyj w Syjmiku i Sekretŏrz Gyneralny Głownego Zarzōndu Ślōnskij Partyje Regiōnalnyj. Badŏcz i popularyzatōr dziejōw i kultury Gōrnego Ślōnska.
Małgorzata Myśliwiec – dr hab. nauk ôbywatelskich, adiunkt w Instytucie Nauk Politycznych i Dziynnikarstwa Uniwersytetu Ślōnskigo w Katowicach. Jeji zainteresowania badawcze to problymatyka systymōw politycznych państw basynu Morza Strzōdziymnego (ze ekstra pozornościōm na systymy polityczne Hiszpanije i Maroka), teoryjŏ terŏźnych nacjōnalizmōw jak tyż tŏwarzistw regiōnalnych i etnoregiōnalnych w Europie, teoryjŏ terŏźnyj dymokracyje, problymy administracyje publicznyj jak tyż szyroko rozumianŏ kwestyjŏ ślōnskŏ.
Dalszŏ tajla artykułu niżyj
REJŌN WELŌNKOWY NR 3
(Jastrzymbie-Zdrōj, Rybnik, Żory, krysy: mikołowski, raciborski, rybnicki i wodzisławski)
Janusz Wita – absolwynt Akadymije Rolniczyj w Krakowie, ôd 2010 roku radny Syjmiku Wojywōdztwa Ślōnskigo, terŏźnie wiceszef Syjmiku i szef Kōmisyje Rolnictwa i Terynōw Wiejskich Syjmiku. W latach 2003-2010 zastympnik fojta gminy Mszana. Czōnek Zarzōndu Ślōnskij Izby Rolniczyj. Kludzi gospodarstwo w Połōmi i kludzi społym ze ślubnōm fyrmã przetwōrstwa jŏdła.
REJŌN WELŌNKOWY NR 4
(Bytōm, Gliwice, krysy: gliwicki, tarnogōrski, lubliniecki)
Aleksander König – absolwynt Uniwersytetu Jagiellōńskigo i II LO m. St. Staszica w Tarnowskich Gōrach. Spōłtwōrca marki i prezes fyrmy Café Silesia – Gryfny Kafyj. Muzyk i filantrop, kapelmajster Kamiliańskij Kapele Dyntyj jak tyż puzonista i lider kapele Silesian Brass Quartet. Laureat Nadgrōd Burmistrza w dōmynie kultury w Tarnowskich Gōrach i Miasteczku Ślōnskim jak tyż Statuetki Ôpery Ślōnskij za „Mecynasa Ôpery”. Prezes Izby Industryjowo-Handlowyj w Tarnowskich Gōrach jak tyż inicjatōr wielu akcyji ôbywatelskich i charytatywnych.
REJŌN WELŌNKOWY NR 5
(Chorzōw, Piekary Ślōnske, Ruda Ślōnskŏ, Siymianowice Ślōnske, Świyntochłowice, Zŏbrze)
Henryk Mercik – dr inż. arch., robiōł za Miejskigo Kōnserwatora Zabytkōw w Rudzie Ślōnskij i Chorzowie. Samorzōndowiec; terŏźnie w Zarzōńdzie Wojewōdztwa Ślōnskigo ôdpadŏ za sprawy kultury i ôchrōny strzodowiska, wczaśnij kludziōł Kōmisyje Edukacyje, Nauki i Kultury w Syjmiku, bōł tyż za wiceszefa Syjmiku. Czōnek Izby Architektōw Republiki Polskij, mŏ uprawniynia rzeczoznŏwcy SKZ w dōmynie architektura i baukōnszt. Ôstoł uhōnorowany Medalym m. Profesora Zygmunta Majerskigo ôd kapituły słożōnyj przi Wydziale Architektury Politechniki Ślōnskij, w 2017 wyróżniony „Ślōnskim Szmaragdym”.
Joachim Otte – dr hab. inż. nauk technicznych, wykładowca Politechniki Ślōnskij w Gliwicach, samorzōndowiec i działŏcz regiōnalny, wiceprezydynt Chorzowa w latach 1998-2010. W 2013 roku ôstoł laureatym kōnkursu „Nojlepszy Radny Chorzowa”, ôrganizowanego ôd redakcyje Dziynnika Zachodnigo. W latach 1991-1997 wykōnowoł funkcyjõ prezesa Zwiōnzku Gōrnoślōnskigo. Ôd 2013 roku w zarzōńdzie Regiōnalnyj Fundacyje Pōmocy Niywidōmym z Chorzowa. Wiceszef Rady Politycznyj Ślōnskij Partyje Regiōnalnyj.
Zdrzōdło i foto: materyje presowe