Rybnik: Gańba!
To sōm już ôstatni chwile, coby niy narobić se gańby – trza wymiynić stary piec, taki co kurzi a smrodzi. Ôd stycznia 2022 roku na cołkim Ślōnsku niy pudzie już hajcować we starych najgorszych piecach – „smrodziuchach”
40 tysiyncy gazetkōw ze informacyjami, kaj bydzie stoło ô terminach wymiany piecōw, przidzie pocztōm do miyszkańcōw Rybnika. Gazetka mianować sie bydzie tak normalnie „Gańba”, co krōtko na poczōntku tłōmaczy prezidynt Piotr Kuczera:
„Ślōnzoki sōm akuratne a herne. Dobrze wiedzōm, co to je słowo gańba. Jo myśla, co dzisiej prawdziwo gańba dlo Ślōnzoka to je hajcować we starym piecu. Nowe prawo godo, co ci, kerzi niy zmiyniōm pieca, zapłacōm sztrofa. To bydzie gańba dostać sztrofa za coś takigo!”
„Uznoł żech, co trza pedzieć to tak ôfyn, bo mōm już za sobōm tela lot godki z miyszkańcami, tōż już wiym, co tym niyprzekōnanym niy przegodōm. Teraz trza pokozać ludziōm, co hned przidzie ôstre prawo. Jak sie podziwōmy na kalyndorz dzisiej, to na wymiana pieca ôstało yno 476 dni, a trza znojś fyrma a tyn piec pomiynić, tōż tyn czas sie fest kurczy – pado prezidynt Kuczera. – Stowka je wielko, niy rozchodzi sie yno ô nasza hera, abo gańba, ale przede wszystkim ô nasze zdrowi a życi! – kōńczy godka prezidynt.
Dalszŏ tajla artykułu niżyj
Gazetki przidōm niy yno bez poczta, ale pudzie ich tyż znojś we miejskim amcie (urzyndzie), bibliotykach, Tyjatrze Ziymie Rybnickij, halo!Rybnik, dōmach kultury, Cyntrōm Usług Spōlnych, Zarzōndzie Transportu Zbiorowego, Zakładzie Gospodarki Kōmunalnej, abo na MoSiRze a we inkszych miejskich instytucyjach. Informacyje ô tym, czym we Rybniku je „gańba”, pokożōm sie tyż na miejskich tabulach, na telewizorach we miejskich autobusach, a bydōm tyż posłane bez miejski zistym sms. Eksta kōmpanijo informacyjno poleci tyż we Radiu 90.
Przekłod: Stanisław Neblik
Zdrzōdło: UM Rybnik