Prymiera Dracha. Trzi słowa tyjatralnego laika… [+foto z praprymiery]
Jak powiym, że niy żałuja, że skuli rybnickij praprymiery Dracha minyły mie sobotni szpile Ekstraklasy, to niy bydzie to nojwyższej klasy kōmplymynt do artystōw, pra? Trudno, ale zowizo dzisiej fusbalowi dowōm pokōj. Toć, ni ma żech krytykiym tyjatralnym, ale szczynśliwy cufal wciepnōł mie w piyrszy szub widzōw, kery widzioł scyniczno adaptacjo eli niy nojlepszej ksiōnżki Szczepōna Twardocha. Cufal dowo mi lekki fory, wzglyndym tych co jeszcze niy widzieli, beztōż dzisio trzi słowa tyjatralnego laika…
- Wyôbraźnio. Ta trza było mieć coby czasowo rozjechano i wyfyrlano, a na piyrsze wejrzyni nawet chaotyczno powiyść Twardocha wkludzić na deski tyjatru. Reżyser Robert Talarczyk pochytoł to ale perfekt. Szauszpilery robiōm swojo robota i voilà Valeska Magnor w jednej sekundzie je 92 lata staro, telepiōm nij sie rynce i umiyro a za chwila wyzgerno i wyskokano mo lot 22.
- Akuratność. Ksiōnżka je do bōlu akuratno historycznie, topograficznie czy jynzykowo. Tej akuratności ni mōgło tyż braknōnć na scynie, na kerej bohatyry godajōm po ślōnsku, polsku i nimiecku i to do porzōndku. Reżyser prziwachowoł coby ślōnskij godki żodyn niy kalyczōł, co przikładowo w polskim kinie je normōm. Niy-Ślōnzoki grali głōwne role a forgot biyda było to usłyszeć.
- Pozōr. Bo pozōr to publika musi dować sztyjc i skupiać sie fest. Spektakl niy dowo umysłowi widza ani chwili na ôdpoczynku. Fto ksiōnżki niy czytoł i ni mo gowy majstra sudoku mo biyda pochytać sie fto jes kim i co sie pocho.
Wyzwani do twōrcōw, scyny a publiki…
—————————
* ô ślōnskij godce w filmie godołech kiedyś sam: https://plus.dziennikzachodni.pl/slonski-fusbal-o-janie-banasiu-konsek-za-hollywoodym-wideo/ar/12171278
Dalszŏ tajla artykułu niżyj
Grzegorz Buchalik – etnolog, historyk, felietōnista, fusbalista. Kludzi bloga Ślōnski Fusbal:
https://www.facebook.com/SlonskiFusbal/
Foto na wuyrchu: Materiały prasowe UM Rybnik, Fotografie: Wacław Troszka