Niy żyje Kazimierz Kutz. Było mu 89 lŏt.
Kazimierz Kutz narodziōł sie 16 lutego 1929 roku w Szopiynicach, a bez cołke życie robiōł dlŏ Gōrnego Ślōnska. To ôn stworzōł filmowy „Tryptyk Ślōnski”, to znaczy „Sól ziemi czarnej”, „Perła w koronie” i „Paciorki jednego różańca”. Wyryżyserowoł tyż film „Śmierć jak kromka chleba”, co ôpowiadŏ ô pacyfikacyji strajku na grubie Wujek w Katowicach po wprowadzyniu sztandu wojynnego.
Przed karierōm ryżyserskōm skōńczōł LO miana Kościuszki w Mysłowicach, a we 1953 skōńczōł Państwowõ Wyższõ Szkołã Filmowõ w Łodzi.
Ôd lŏt 70. bōł inwigilowany ôd Sużby Bezpieczyństwa, co zanotowała, iże kōntaktowoł sie ze czōnkami KOR i „Solidarności”. We sztańdzie wojynnym bōł internowany i wypuszczōny po interwyncyji biskupa katowskigo Herberta Bednorza.
We 1997 roku weszoł w politykã i bōł ôbrany na synatora ze listy Unije Wolności i robiōł za synatora bez ôziymnŏście lŏt. We 2015 niy kandydowoł we welōnku parlamyntarnym.
Dalszŏ tajla artykułu niżyj
Moc razy hōnorowały go rozmajte instytucyje. Bōł dŏchtorym honoris causa Uniwersytetu Ôpolskigo, dostoł tyż miyndzy inkszymi Złote Lwy na festiwalu filmowym we Gdańsku, Złotõ Medaliã „Zasłużony Kulturze Gloria Artis” i Ślōnski Szmaragd ôd diecezyje katowskij Kościoła Wanielicko-Augsburskigo.
Foto: Tobiasz “Anorak” Koprowski, Wikimedia Commons