Nagroda Nobla zaś na Ślōnsku
Olga Tokarczuk była uhōnorowano literackōm nadgrodōm Nobla za rok 2018.
Akadymijo Szwedzko postanowiyła prziznać Nadgroda Oldze Tokarczuk „za fantazyjo narracyjno, co ze yncyklopedycznōm pasyjōm reprezyntuje przekroczanie granic jako forma życio”.
Tokarczuk narodziyła sie we Sulechowie na Dolnym Ślōnsku. Jak jij było 11 lot, to przekludziyła sie ze ôjcami do morawskigo Ketrza, kaj skōńczyła liceum. Na Uniwersytecie Warszawskim sztudiowała psychologijo.
Po sztudyji robiyła za psychoterapeutka we Wałbrzichu, a jak zaczła robić ino za pisarka, to przekludziyła sie do Nowyj Rudy. Dzisiej durch miyszko na Dolnym Ślōnsku i dzieli swōj czas miyndzy Wrocław i Krajanōw.
Dalszŏ tajla artykułu niżyj
Jeji piyrszy rōman, „Podróż ludzi księgi” (Rajza ludzi ksiyngi) ze 1993 roku dostoł nadgroda Polskigo Towarzistwa Wydowcōw Ksiōnżek. Jeji trzeci rōman, „Prawiek i inne czasy” (Prawiek i inksze czasy) bōł nōminowany do Nadgrody Literackij „Nike”, a autorka dostała za niego Paszport „Polityki”.
We 2007 roku ôpublikowała rōman „Bieguni”, co za niego dostała Nadgroda Literacko „Nike” we 2008 roku, a we 2018 – społym ze Jennifer Croft, tumaczkōm na angelski jynzyk – Miyndzynorodowo Nadgroda Bookera.
Latoś, przi ôdbiyraniu hōnorowego ôbywatelstwa Wrocławia pedziała:
„Joch je federalistka i regiōnalistka, wierza w Europa zjednoczōnych regiōnōw i marzi mi sie Polsko Republika zdecyntralizowano, co mo siyła we swojij rozmajtości. Wierza tyż we ruchōmy ukłod rozmajtych warstw naszyj tożsamości, co sie niy eliminujōm, ale wzajymnie dopołniajōm. Idzie być we jednym czasie Europejkōm, Polkōm, Dolnoślōnzoczkōm, a tyż wrocławiankōm”.
Tokarczuk to drugo literacko noblistka ze Ślōnska i drugo kobiyta – noblistka ze Ślōnska. We 1912 roku we dziedzinie literatury nadgrodzōny bōł Gerhart Hauptmann, a we 1963 we dziedzinie fizyki Nadgroda dostała Maria Göppert-Mayer.
Ilustracyjo na wiyrchu: Olga Tokarczuk, fot. Borys Nieśpielak / DeFacto, CC BY-SA 4.0