Na gōrnoślōnskich szportplacach, 6.05.2018

Tyn weekend bōł średnio udany dlŏ manszaftōw ze Gōrnego Ślōnska. We nojwyższej lidze fusbalu (we Polsce i Rep. Czeskej) yno Gōrnik Zŏbrze mōg sie radŏwać ze 3 punktōw. Fusbalŏrze ze Zŏbrzŏ wygrali zajś na wyjeździe. Terŏzki we Lubinie ze Zŏgłymbiy 2-0 po torach Marcina Urynowicza (7 minuta) i Damiana Kędziora (34 minuta).

Gorzyj poszło Piastowi. Fubalŏrze z Gliwic grali we Nowym Sōnczu ze Sandecjōm i przegrali 2-1. We 28 minucie tora dlŏ gospodŏrzy strzelōł Filip Piszczek. We 66 minucie na 1-1 wyrownoł Tomasz Jodłowiec. Kiedy fusbalŏrze Piasta już sie radowali ze punktu, to we ôstatniej minucie na 2-1 dlŏ Sandecji tora strzelōł Wojciech Trochim.

Gōrnik je 4, a Piast 13.

We czeskej I lidze tyż bez rewelacji. Banik Ôstrawa wylŏz ze placu, z kerego ślatuje sie do II ligi, ale… zamiyniōł sie niym ze MFK Karwinōm. Banik groł ze Mladōm Boleslav i szpil skōńczōł sie bez torōw, a Banik we ôstatniej minucie piyrszej połowy przestrzelōł elwra. Kupa gorzyj poszło MFK Karwinej, kerŏ grała u siã ze Duklōm Praga. Fusbalŏrze ze Ślōnska przegrali go 1-3 i ślecieli na przedôstatni plac we tabuli. Prowadzynie dlŏ Dukli zdobōł Uroš Đuranović. Wyrownoł Jan Kalabiška, ale to bōło wszystko na co bōło stać Karwinŏ tego dnia. Potym dwa tory strzelyli fusbalŏrze ze Pragi: Lukáš Holík i Branislav Milošević. Sytuacyjŏ ôd Karwinej zaczynŏ być ciynżkŏ, czego by my jeszczy we marcu nie pejdzieli.

Banik je 14, Karwina 15.

We I lidze polskej (podug nŏs drugej) GKS Katowicy przegroł we Olsztynie i ślecioł na czwŏrty plac we tabuli. Na samym spodku dalyj Ruch Chorzōw i tego manszaftu chyba już nic nie uratuje przed ślecyniym do II ligi. Do kōńca ôstało 5 szpilōw. Sã wyniki manszaftōw ze Gōrnego Ślōnska.

Bytovia Bytōw – Ôdra Ôpole 1-0
GKS Tychy – Miedź Legnica 1-0
Podbeskidzie Biylsko-Biołŏ – Rakōw Czynstochowa 1-1
Ruch Chorzōw – Puszcza Niepołomoice 0-2
Stomil Ôlsztyn – GKS Katowicy 1-0

GKS Katowicy je 4, GKS Tychy 8, Biylsko-Biołŏ 10, Ôdra Ôpole 11, a Ruch ôstatni.

We II lidze czeskej manszafty ze Ślōnska słabo, ale Ôpawa już je prawie zicher awansu.

Slezsky Ôpawa – Dynamo Czeske Budziejowice 1-1
FK Pardubice – Fotbal Trziniec 1-0
MFK Fridek-Mistek – FK Varnsdorf 1-1

SFC Ôpawa je 1, Trziniec 5, a Fridek-Mistek 14.