Na gōrnoślōnskich szportplacach, 29.07.2018
Drugŏ kolejka we polskej i czeskej lidze, a u ślōnskich manszaftōw dalyj bez zmian…
We I lidze polskej grŏ yno Gōrnik Zŏbrze, bo Piast Gliwice mŏ szpil we pōniydziałek na wieczōr. We Zŏbrzu po nieudnyn szpilu we II rudzie kwalifikacyji do Ligi Europy (przegranŏ we czwŏrtek u siã 0-1 z AS Trenczyn), we niedziela czekali na kōmplet punktōw ze Wisłōm Płock. Szpil bōł wyrōwnany, ale piyrszego tora strzelōła Wisła, a gynau Ricardo Cavalcante Mendes (46 minuta). We 76 minucie na 1-1 trefiōł Igor Angulo i tak już ôstało do kōńca szpilu.
II liga polskŏ:
Rakōw Czynstochowa – GKS Jastrzymbie 2-2
Podbeskidzie Biylsko-Biołŏ – Termalica 1-2
GKS Tychy – Chrobry Głogōw 1-1
Ôdra Ôpole – Sandecja 1-0
ŁKS Łōdź – GKS Katowice 0-1
Na piyrszym placu po dwōch kolejkach je Ôdra Ôpole.
Dalszŏ tajla artykułu niżyj
We lidze I czeskej wszystke trzi manszafty ze Ślōnska przegrały swoje szpile.
Slezsky Ôpawa grŏ u siã ze Fastawym Zlin i ôd samego poczōntku mieli pod gōrka. Nojpiyrw czerwōnŏ kartka dostoł Jaroslav Svozil (już we 15 minucie), chwilã potym na 1-0 dlŏ Zlina trefiōł Lukáš Bartošák (20 minuta). Ôpawa prōbowała we ôsłabiynu wyrōwnać i udało sie to już we 36 minucie, kiedy tora dlŏ Slezkygo strzelōł David Puškáč. Po przerwie corŏzto barzyj bōło widać przewaga jednego fusbalŏrza po strōnie Zlina i we 54 minucie we tor ôd Ôpawy trefiōł Tomáš Poznar, kery prziszed do Fastawu nazŏd z wypożyczynia w Ôstrawie.
Jeszczy srogszego pecha mioł Banik Ôstrawa, kery przegroł we doliczōnym czasie w Uherskim Hradišciu z FC Slovacko 2-1. Nojpiyrw gospodŏrze trefiyli we 22 minucie po torze Jana Kuchty. We 35 minucie wyrōwnoł Daniel Holzer i kiedy prawie wszyscy liczyli już, ze ôba manszafty potajlujōm sie punktōma, to w 92 tora dlŏ Slovacka strzelōł Filip Kubala.
Blank inaczyj wyglōndoł szpił MFK Karwinej, kerŏ grała w Pradze ze Slaviōm i przegrała klar, bo aże 4-0. Po tej kolejce Karwina je już ôstatniŏ we lidze.
II liga czeskŏ:
Fotbal Trziniec – SK Prosztejow 0-2
