Na gōrnoślōnskich szportplacach, 26.05.2019
Fusbal
Grali już yno we Republice Czeskej i to finał pucharu a ôstatnie szpile we lidze.
Nojpiyrw we strzoda we Ołomuńcu finał Pucharu. Ślōnski Banik Ôstrawa groł ze nowym majstrym ligi czeskej, Slaviōm Praga. No i bōło widać, co tyn rok nŏleży do Slavii. Nie yno majster ligi czeskej, ale tyż ćwierćfinał Ligi Europy, kej dopiyro ôstali sztopniyńci bez Chelsea, a nojpiyrw wyciepli m.in. Sevilla. We finale Banik walczōł, ale Slavia bōła na boisku lepszŏ i wygrała 2-0. Za to na trybunach prziwiōnzaniy do Ślōnska efektowniy demōnstrowali kibice Banika, kerzy przipōminali, iże przinŏleżōm do Ślōnska, choć ôd 3 lŏt grajōm na stadiōnie po morawskej strōnie Ôstrawy.
We lidze czeskej ôstatniŏ kolejka.
Bohemians Praga – Slezsky Ôpawa 1-1
1.FC Slovacko – MFK OKD Karwinŏ 2-0
Viktoria Pilzno – Banik Ôstrawa 1-1
Banik Ôstrawa skōńczōł na 5 placu, Slezsky Ôpawa na 12, a MFK OKD Karwinŏ na przedôstatnim i czekajōm jõ jeszczy szpile ô utrzimaniy. Piōnte miejsce dowŏ Banikowi Ôstrawa szansa gry ô Liga Europejskŏ. 1 czerwca we Ôstrawie Banik zagrŏ ze Mladōm Boleslav. Fto wygrŏ tyn szpil, bańdzie grać we eliminacyjach Ligi Europejskej.
Dalszŏ tajla artykułu niżyj
Handbal
We ôbu ligach kōńczōły nasze manszafty. I mōmy strzebny a brōnŏtny medal. Ô ile brōnŏtny medal dlŏ Gwardyje Ôpole we lidze polskej to srogi sukces, to strzebny dlŏ HC Banika Karwinyj we lidze czeskej ôstawi dziebko niedosytu.
Napocznijmy ôd HC Banika Karwinyj. Handbalery ze Ślōnska po trzech szpilach we finale wygrywali 2-1 i stykło jym wygrać we strzoda u siã ze Talentem Pilzno, coby ôstać majstrym ligo czeskej, tak jak łōńskego roku. Szpil we Karwinyj skōńczōł sie ale remisym 29-29 i trza bōło “elwrōw” coby ustalić wygranego. We “elwrach” wiyncej nerwōw mieli handbalery ze Pilzna i to ôni wygrali je 5-6.
We niedziela ôstatni szpil prziszło grać we Pilźnie i to gospodŏrze byli faworytōma. Handbalery ze Ślōnska zagrali ôd poczōntku ale fest skōncyntrowani i na pauza złaziyli ze prowadzyniym 11-14. Po pauzie dalyj nie planowali sztopnōnć i bōło już 5 torōw przewŏgi dlŏ Banika. No i tukej zaczło sie cojś psuć. Manszaft ze Pilzna zaczōn gōnić i na 10 minut przed kōńcym wylŏz na prowadzyniy. We trzech ôstatnich minutach Karwinŏ miała kupa pretensyjōw do szidsrichtra, ale we tak wartkym i kōntaktowym szpilu jak handbal, take pretynsyje zawsze sōm. Dostali czerwōnŏ kartka i dwa wartke tory ôd Pilzna i na pōłtoryj minuty do kōńca przegrywali 27-25. Krōm jednego handbalera maniyj ciepli tora na 27-26 i na 40 sekund przed kōńcym wyrōwnali. Na 3 sekundy przed kōńcym narzykać mōg manszaft z Pilzna, bo terã jym tora nie uznoł szidsrichter. I zajś prziszło do “elwrōw”. We piyrszym “elwrze” Karwinyj pomyloł sie nojpewniejszy do tego czasu Michal Brůna i to stykło do wygranej manszaftu ze Pilzna i majstra, a Karwinŏ musi radować sie ze strzybengo medalu.
We sobota w Ôpolu Gwardia grała rewanż ze MMTS Kwidzyń. Piyrszy szpil we Kwidzyniu wygroł MMTS 25-26 i Gwardyjŏ potrzebowała wygranej dwōma torōma. Do pauzy bōło 16-13, potyn już 25-19, żeby zrobić sie nerwowo 25-23. Ale manszaftowi z Kwidzynia nie stykło już czasu na ôdbrŏbianie i we Ôpolu radujōm sie ze brōnŏtnego medalu, kery je drugim po 1964 roku! Gratulujymy!
A coby Wōm pokŏzać jak fest ôstrym szpilym je handbal, to zaprŏszōmy do fotogaleryje Jakuba Żmudy ze szpilōw Gwardyje Ôpole ze Puławōma i Zŏbrzym.
Fotografije: Jakub Żmuda – https://www.facebook.com/JsPhotography23/
A co za tydziyń? We Paryżu ruszŏ tynisowy Grand Slam na kortach Roland Garros. Startuje tam i rodzōnŏ na Ślōnsku we Bilovcu Petra Kvitová, ale te korty nigdy nie bōły jyj mocnõ strōnõ, tōż nie liczymy na sroge sukcesy.
