Na gōrnoślōnskich szportplacach, 19.08.2018
Zajś słaby tydziyń gōrnoślōnskich manszaftōw i to tak samo w lidze polskej jako i czeskej.
We I lidze polskej we sobota Gōrnik Zŏbrze u siã groł ze Lechiōm Gdańsk. We Zŏbrzu mieli nadziejŏ prześcignōnć Lechiŏ, ale manszaft ze Gdańska pokŏzoł, co ôstatnio je we formie i wygroł 2-0 po torach ôd Karola Fili i Flavio Paixao.
Piast Gliwice tyż piyrszy rŏz w tym sezōnie przegroł. Fusbalŏrze z Gliwic mieli ale ciynższe zadaniym, bo grali ze trzeciōm przed tōm rundōm Jagiellōniōm Biołtysok. Nojpiyrw na 1-0 dlŏ Jagiellōnii trefiōł Mile Savkovic (22 minuta). Po pauzie wyrōwnoł Patryk Dziczek (58 minuta), kery mōmynt nieskorzyj mōg trefić na 1-2 dlŏ Piasta. Tak sie ale nie stało i Jagiellōnia strzelōła tora na 2-1 we 95 minucie.
Piast Gliwice je 5, a Gōrnik Zŏbrze 9.
Dalszŏ tajla artykułu niżyj
We II lidze polskej manszafty ze Gōrnego Ślōnska grały tak:
Ôdra Ôpole – GKS Jastrzymbiy 1-2
GKS Tychy – Stōmil Ôlsztyn 0-3
Stal Mielec – Podbeskidzie Biylsko-Biołŏ 0-1
GKS Katowicy – Wigry Suwałki 2-0
Biylsko-Biołŏ je trzeciŏ, GKS Katowicy 5, Ôdra Ôpole 10, GKS Tychy 14, GKS Jastrzymbiy 17.
We I lidze czeskej Slezky Ôpawa pojechoł do Mladej Bolesław i mioł tam fest klupane. Mladŏ Bolesław wygrała 6-1 i strzelōła we jednym szpilu tela samo torōw co we wszystkich szpilach do terŏzki. Jedynego tora dlŏ Ôpawy trefiōł Matěj Helebrand.
MFK Karwina grała u siã ze Viktoriōm Pilzno, kere po 4 szpilach miało kōmplet punktōw. Viktoria i we Karwinej nie przerwała seryje i wygrała tyn szpil 1-0.
Banik Ôstrawa zajś bandzie grać we pōniydziałek (ze Sigmōm Ołomuniec) i szpil idzie ôglōndać ôd 18.00 live na ČT sport.
Banik je 5, Slezky Ôpawa 14, MFK Karwina 15.
We drugej lidze czeskej Fotbal Trziniec przegroł we Znojmie 2-0 i bez punktu je na ôstatnim placu we tabuli.
Foto na wiyrchu: PIVISO, via Wikimedia Commons
