Jastrzymbie: pościg za przestympcōm aż na czeskõ strōnã
Szandarzi z wydziału ruchu drōgowego jastrzymbskij kōmyndy kludziyli pościg transgraniczny za szoferym mazdy. Chop ôstoł zastawiōny w Jastrzymbiu do kōntrole drōgowyj. W jeji czasie pokŏzało sie, iże je poszukowany. 29-latek wziōn uciykać, a mōndurowi gōniyli go bez krys wodzisławski i Rebublikã Czeskõ. Tam drapli jastrzymbiana i przekŏzali go kamratōm z czeskij policyje. Chop mioł przi sie brōń pŏlnõ gazowõ jak tyż postrzodki odurzające.
We wtorek w nocy kole godziny 2.30 policyjōny z jastrzymbskij drogōwki uzdali zastawić do kōntrole szofera mazdy W czasie czynności pokŏzało sie, iże chop je poszukowany. Jak wachtyrz prawa podeszoł do szofera i kŏzoł mu wyjś ze auta, chop prōbowoł zapŏlić motōr. Szandar bez ôtwarte ôkno prōbowoł go zastawić, ale w kōńcu poradziōł sztartnōńć wozidło i wziōn uciykać.
Wachtyrze prawa zarŏz zaczli go gōnić bez krys wodzisławski aż do Republiki Czeskij. Policyjōny zastawiyli chopa w Trzanowicach. 29-latek jeszcze prōbowoł uciykać piechty, ale ôstoł obezwładniōny i zastawiōny ôd jastrzymbskich policyjōnōw, co przekŏzali go kamratōm z czeskij policyje. W czasie zastawiyniŏ policyjōny znŏdli przi nim brōń gazowõ jak tyż postrzodki bamōncōnce, co ôstały zabezpieczōne ôd czeskich mundurowych. Policyjōn, co w Jastrzymbiu prōbowoł zablokować chopowi sztartniyńcie motora, doznoł urazu rynki i trefiōł do lazarytu. Na szczyńście jego życiu niy grozi niybezpieczyństwo. Po dostaniu pōmocy dŏchtōrskij, wyszoł do dōm.
Jastrzymbiōn ôstoł sprawdzōny ôd mōndurowych z Czech. Wczorej 29-latek trefiōł w rynce kryminalnych z Jastrzymbiŏ. Pokŏzało sie, iże mioł ôn przi sobie marihuanã jak tyż inksze postrzodki bamōncōnce. Poszukowany ôstoł przewiyziōny do Zakładu Kŏrnego w Cieszynie. Przedstawiōno było mu ôbskarżynie czynnego ôporu jak tyż niyzastawiyniŏ sie do kōntrole drōgowyj, za co grozi mu do 5 lŏt heresztu, jak tyż bezwarōnkowy zakŏz kludzyniŏ wszelich wozideł. Ô jego dalszym losie uzdŏ prokuratōr i gyricht.
Dalszŏ tajla artykułu niżyj
