Gynsipympki, Paktofonika i ślōnske noblisty
Eli ftoś kozōłby Wom forsztelować sie konkurs do szkolorzy, to na zicher byście forsztelowali sie znerwowane bajtle we biołych oberhymdach i wybiglowanych keckach/galotach, a wele nich lagramyncko strasznych rechtorōw, kere pytajōm sie ich ô roztomajte ciynżke rzeczy. Nale to niy ma obrozek, kery zoboczycie na finale Wojewōdzkigo Konkursu Wiedzy ô Regionie “Silesia Incognita”.
Latoś finał bōł we sobota dwanostego czyrwca we tyskij Szkole Podstawowyj nr 37 im. Makuszyńskigo, kero rychtuje tyn konkurs wroz ze Muzyjym Miyjskim we Tychach. Udział wziynło trzydziści nojlepszych manszaftōw, kere jury (kludzone bez dochtora Michała Dziōbka) wybrało spostrzōd bezma setki inkszych, kere wziynły udział we eliminacyjach. Nojlepsze ôkozały sie Aleksandra Morawiec i Anna Musioł, frelki ze Szkoły Podstawowyj im.Pawła Stalmacha w Przegędzy i to ône bydōm rajzować do Bruksele z Europosłym Łukaszym Kohutym, kery już drugi roz robiōł za patrona honorowego i drugi roz fōndnōł tako rajza nojlepszyj drużynie. Nale inksze manszafty tyż jechały do dōm rade, dziynki piyknym nagrodōm (m.in.ślōnske treski i ksiōnżki), fōndniyntym bez nowego sponsora, firma www.kajonshow.pl.
Nojważniyjsze je to, co we finale kożdy miōł mocka szpasu. Szło sie posuchać ślōnskij muzyki (była Trzecio Symfonio Henryka Mikołoja Gōreckigo, ale bōły tyż kōncki Paktofoniki, Myslovitz i Kata), trza było wiedzieć w kerych obozach po drugij wojnie światowyj trzimali naszych starzikōw, jak wyglōndała Maria Goeppert-Mayer, kere ślōnske manszafty zrobiyły majstra we hokeju i na kero Ślōnzoczka godali “Gynsipympek” (angelske “Daisy”, polsko “Stokrotka”). Latoś we Tychach zaś udowodnili, co ô Ślōnsku do sie uczyć tak, coby kożdy miōł z tego szpas: i bajtle i rechtory.
Foto: Grzegorz Krzysztofik
Dalszŏ tajla artykułu niżyj
