Tŏrg i byki….
Na takim poznańskim tŏrgu rolniczym „Polagra” szpacyruje ci sie pampōń ze swojōm babōm. Zaklechtali sie na taki sztand, na kerym pokazowali szumne i szykowne byki. Podłajżōm do piyrszyj klŏty a tam na takim papyndeklu je naszkryflane:
„Tyn byk wlazowôł we łōńskim roku na kalymba, na krowa piyńćdziesiōnt razy.”
Babeczka tego pampōnia tak zolytnie sztucho go we ziobra i gŏdŏ prziliźnie:
– Hej, chopecku, dzisz to ? Piyńćdziesiōnt razy we roku tyn byk to robi! Mogbyś sie i ty cegoś łod niygo naumieć!
Kwanckajōm sie dalszij, podlazujōm do drugij klŏty a tam tyż na tym papyndeklu naszkryflane je tak:
„Tyn byk łōńskigo roka wlazowôł na kalymba sto dwacet razy.”
Babeczka tego mimroka pampōnia deczko festnij dugła swojigo chopa we ziŏbra i jesce barzij bōmbōni sie do niygo i gŏdŏ:
– Hej, hej, eźli ty to miarkujez? Tyn byk to robi, co kôżdy chop mô robić swojij babie, wiyncyj niźli dwa razy we tydniu! Jużcić i ty mogbyś sie łod niygo moc naumieć!
Pyndalujōm sie tak polekuśku, kackajōm sie dalszij aże sztopnyli kole trzecij zegrody. A tam, tyż na takij szperplacie srogimi literoma wtosik naszkryfłoł:
„Tyn byk to isty rekorder; tyn herski byk we łōskim roku wlazowŏ na kalymby aże trzista szejśćdziesiōt piyńć razy !!!”
Żona chnet ziôra tymu swojimu chopowi niy połōała i już festnie zmyszōno, mory jōm bierōm i gŏdŏ ze rankorym:
– Kuknij sie ino chopie! Tyn byk to robi kŏżdydziyń! Łod tyj gadziny to mōgbyś na isto moc dobrygo sie naumieć !!!
Chop już niy poradzi szczimać tyj szpicatyj gôdki łod swojij baby i ze festelnōm spōrnościōm gŏdŏ ku tyj babie:
– A ty, a ty to sie sam wartko spytej tego byka eźli łōn to robiōł zawdy ze jednōm i tom samōm kalymbōm ???
Ojgyn z Pnioków
Obraz Artur Pawlak z Pixabay
Dalszŏ tajla artykułu niżyj
